Election Commission of India in Mizoram MLA inthlanpui vote chhiar hun atan Pathianni a ruat chu Kristian te ni pawimawh anih avangin sawn turin political party hrang hrang, kohhran hote leh tlawmngai pawl ten an ngen a. Tlawmngai pawl intelkhawm NGO Coordination Committee ten ECI hmua sawn tura an ngen hnuah chhanna engmah a awm loh hnuin Zirtawpni khan lungawiloh lantirnan punkhawm a ni a, Mizo mipuite duhdan hria leh ngai pawimawha vote chhiar hun sawn a ni ta hi a lawmawm tak zet a ni.

Election Commission of India in Kristian te ni serh khera vote chhiar tura ruahmanna a siam hi kan tan chuan pawm thiam a har hle ang. Pathianni hi kan hriat angin Mizoramah chuan kan ni serh a ni a, Pathian kan biakna ni a niin inkhawm lemlo pawh hnathawk lova kan hahchawlhna ni a ni. ECI tan zawnga thenkhat ten vote chhiar tura ruat leh official tlem te chauh vote chhiar ah hian an inhnamhnawih dawn nia an sawi hi a dik rualin MLA inthlan kher hi chu kan ngaih pawimawh ber leh mitin nghawng a ni a. Inkhawm mah ila Pathian biakna lamah kan rilru kan pe dawn lo tih a lang reng a ni.

Chutih rual erawh chuan political party, kohhran leh NGO te pawhin tihsual lian tak kan nei ve a. ECI lokal khan kan duhdan te ngaithlain Inrinni leh Pathianni a inthlan kan duh loh thu kan lo thlen a. Pathianni a vote chhiar chungchang erawh an ti dawn lo nia kan ngaih vang nge kan lo mangnghilh tlang tlat mai a. Inthlan dawn khan inthurualin 'Pathianni a vote in chhiar dawn chuan vote kan thlak lo mai ang e' tia inthurualin ECI lamah thu thlen ila chuan hetiang hian ruahmanna siam a ni lo mai thei.

Election Commission of India hnena kan thu thlen danah pawh kan che tlai deuh niin a lang a. ECI hian vote chhiar hi ni khatin han sawn hma se Sabbath ni a ni a, han ti tlai dawn se Parliament session nen a in nang leh dawn nen a buaithlak a, hetia Pathianni an ruat hi an thlirna atang chuan tihawm tak a ni ve tlat a ni.   

Mahse hun tepter tawh taka Mizo Kristian te tawngtaina chhana an awm leh vote chiar hun sawn a ni ta hi a lawmawm tak zet a. Kum 2018 inthlan dawna CEO ni lai kan um chhuak thei te, tun tuma vote chhiar hun sawn a ni te hi thil mak tak a niin kan zavaia tanrualna rah a ni. Hun lokal zel turah pawh mipuite kan tanrual phawt chuan hei aia harsa leh khirh pawh kan la tawn tlang zel a beisei awm hle.