Hunpui a lo thleng leh tan a, Lirthei endik chungchanga mipui hriattur thuchhuah hmuh tur a awm chho leh zut tawh a, Lirthei document fel lo te ngaihnathiam an nih loh tur te thu te pawh a chuang a, transport office leh pollution tihna hmuh pawh a lun phah hle a, heng hmunah te hian lirthei document fel lo buaipuiin  mi tam tak an buai thin hle.

Mizo te hi hnam naupang tih takah kan ngaih a sam em em a, kan lirthei document dinhmun pawh ngaihtuah lem lo a, a khalh ringawt pawl pawh hi kan tam viau niin a lang a, sawrkar lamin lirthei fel lo a endik tur thuchhuah an siam hian buai fe fe hi awm thin a ni a, tax pek tur hrang hrang pek loh vanga buai hi a sang tel hi an awm ziah a ni ber.

Tunhnaiah sawrkar laipuiin thuchhuah siamin pollution leh document fel lo te na taka hrem an nih theihna tur thuchhuah a siam a, pollution tih ngai leh document fel lo te Transport Pisa lamah leh Pollution tihna hmunah thui tak tak an intlar a, tlemin sawrkar an inthlahdul deuh a, pollution tihna lam an reh leh duak a, hunpui an thleng dawn a, sawrkarin ‘No tolerance drive’ a neih tur thu an puang leh a, pollution leh document lam tih fel ngai an pung leh ta hluai chu a ni ber a, a nihna takah chuan kan chhiah chawi tur te chawi turin vau kan ngai ni ber hian a lang.

Chutihrualin sawrkar lam hian ‘No tolerance drive’ hi ngatinge hunpui dawn, sum leh pai lamah pawh mi induhthawh lai, kan khawpui te a tawt vanglai taka he hun hi an hman ziah chhan tih pawh hi ngaihtuahna a ti thui khawp mai. Hunpui bawr lo deuhah hian tih theih dan awm se a duhawm khawp mai. Nge mipui chhuahvah tam lai tak hi an chang a, pawisa ba inthinna hun tha berah an ngai tih ngaihtuahna pawh a awm.

Hunpui dawn chho, lirthei leh mipui tam vanglai taka hetianga hmalak hi a buaipuitu Traffic Police lam tan pawh a buaithlak ngawtin a rinawm a, peng tina duty a tul lai, lirthei che vel hrim hrim hneh taka thunun hunlaia hna dang pek belh an ni thin hi an tan chuan a luhaithlak ve ngawt chuan a rinawm. Heng hunlaia anmahni pui tur hi sawrkarin thawktu a pek belh thin a nih chuan an tihawm tak an ti a ni ang a, an pe lo anih chuan a inennawn ve pawh a tul hle ang. Tin, ‘No tolerance drive’ neih hi mipui himna atana ti hrim hrim nge an nih a, sawrkarin Revenue tha a duh vangin an ti zawk tih pawh hi ngaihtuah tham tak a ni.