Tunlai hian sawrkar leh mipui lamah thu inchuh lian tak mai a awm a, chu chu Mizoram sawrkarin a enkawl mek Lengpui airport Indian Air Force kuta hlan leh hlan loh chungchang a ni. Mizorama sawrkar chuan Lengpui airport enkawl chu a hautak avangin a zirchiangtu tur Adviser to Chief Minister (Finance) kaihhruaiin Working Committee on Lengpui Airport a din a, committee hian zirchianna hrang hrang a neih hnuah IAF kuta hlan chu thil tha ber niin a ngai a. Sawrkar pawhin IAF hnena hlan mai chu tha tiin hmalakna pawh kalpui chhoh mek a ni a, mahse hetih lai hian eptu party te leh tlawmngai pawlte chuan an duh lo thung a ni.

Kan hriat angin Lengpui airport hi kan state sawrkar enkawl a ni a, a enkawlna senso hi a hautakin kum tin nuai engemaw zat sen a tul a. A hlawkna hmuh aia senso a let engemaw zata a tam vang hian state tan enkawl a hautak a, chuvangin midang kuta hlan mai hi sawrkar chuan tha zawkin a hria a ni. Sawrkar thlirna hi sum leh pai dinhmun en chuan thil tih awm tak pawh niin a lang a, hetih laia mipui ten an hriatthiam loh chu sipai kuta hlan tum a ni kher lai hi a ni.

Lengpui airport hi IAF kutah hian hlan ta ila state sawrkar sum sen thin chu nasa takin a tlahniam ngei dawn a, chumai bakah tun ai hian kawng tam takin hmasawnna pawh hmuh a beisei awm a ni. India ramah hian sipai enkawl airport hi engemaw zat a awm a, kan bulhnai maiah pawh Silchar leh Bagdogra chu sipai enkawl an ni a, mahse airport dangte aia an hmasawnna leh chungnunna hmuh tur a awm lova. Engemaw indo lo thleng palh leh thildang tam takah mipui ten hlauhthawn an nei hi thil awm tak pawh a ni. Aizawl-ah ngei pawh kan infiamna hmun laili leh tha ber Lammual chu sipai thuneihna hnuaia awm anih tlat avangin duh duh hunah mipui ten kan hmang thei lo a, kan hmang duh anih pawhin an phalna a ngai zel te hi thil buaithlak tak a ni.

Lengpui airport hi India rama airport enkawltu ber Airport Authority of India kuta hlan hi mipui duhdan ber niin a lang a. AAI dawr kawngah pawh hian sawrkar hian tih tak zetin tha a la thawh lo niin an sawi a, official level-a inbiakna mai bakah ministry chakna hmanga na taka nawr nise awmzia a neih lehzual a rinawm a. Tunah phei chuan Civil Aviation Secretary-ah zo hnahthlak ngei, Chief Secretary atan pawha kan mi duh awm lai a ni bawk nen nasa lehzualin sawrkar hian hma la se chuan kan ngenna hi mi pawmsak ngei a rinawm. Hun kha leh chen state sawrkarin a lo enkawl tawh airport hi sipai kutah kher loa midang kuta hlan dan awm hram se tih hi mipui tam ber duh dan niin a lang.