Mizote hi British khan min thenhrangin a then Burma ah awmin a then Bangladesh ah te kan awm a. India ram chhunga mite pawh state hrang hrangah awm darhin Mizoram hi Mizote chuan 'kan ram' tia kan chhal theih awmchhun a ni awm e.

Tunhnaiah kan unau ten harsatna chi hrang hrang an tawk a, kan hnung deuh khan Assam lamah kan Hmar unau te leh hnamdang te intibuaiin mi engemaw zat an rawn raltlan a. Myanmar tualchhung buaina avangin mi engemaw zat te chu Mizoramah rawn lutin tun thlengin mi tam zawk chu an la awm a. Chutiang zelin Bangladesh buai avangin mi engemaw zat an rawn raltlan bawk a. Manipur lamah pawh Meitei nena buaina avangin mi sang tel raltlanin an rawn lut bawk a ni. Kan unaute kan lo dawnsawn danah hian Mizoram rawn beltute pawh an lawm hle niin a lang a, a lawmawm hle.

Heng kan unau te hian an inpui Mizoram an rawn bel a, duat taka kan lo enkawl leh dawnsawn hi kan tih zel tur a ni. Mizoram hian kan hmalamah hian enge kan tawn dawn hriat a ni lo a, kum 1966 buai vang khan mi tam tak chu Burma leh state thenawmah te sahimna zawngin an tlanchhia anih kha. Tunah heti hian kan unau ten harsatna an tawk ve leh a, hetia buaipui theia kan awm hi a vanneihthlak hle.

Kan unau harsatna tawk te hian enge an hmachhawn zel dawn tih hriat a har hle a. Manipur a zo hnathlak leh Meitei buaina te hi a reh mai dawn lo niin a lang a. Chutiang bawkin Myanmar tualchhung buaina pawh hian eng chen nge a awh ang a, engtikah nge a reh ang tih pawh hriat mai har tak a ni. Manipur buainate hi a rilin a thuk a, thisen pawh tam zawk la chhuak thei a ni. Chutiang zelin Myanmar lamah pawh sipai leh mipui lam an inkap chho zel a, kan ram thenawm maia sipai camp engemaw zat chu mipui lam tang ten an la a. Tunah hian hmabak engemaw zat an la nei bawk a, heng hmun te hi mipui thlawp ralthuam keng te hian an bei zel anih chuan sahimna zawngin nunau chu an tlanchhiat a ngai ngei dawn a, raltlan tam zawk pawh lo lut thei an la ni.

Chuvangin kan unau te hian tun aia harsatna lian zawk pawh hi an la tawk thei a, chutih rual chuan a fel duak thei bawk. Engpawhnise kan unau ten harsatna an tawk anih chuan duat taka lo dawnsawn zel a, an tan inpui nih hi kan tum zel a pawimawh hle.