Khawvel ram hrang hrangah hian chhiatna chi hrang hrang kangmei, tuilian, thlipui, lirnghing leh leimin-te a thleng thin a. Ram hrang hrang ten an tawrh dan a inang lo hle mai a, ram thenkhatah lirnghing vanga mi tam tak an thih laiin tuilian avanga buai te, thlipuiin a tihbuai ram tam tak an awm a ni. India ramah pawh heng chhiatna chi hrang hrang kan tawrh dan hi a inang lo hle mai a, heng chhiatna thleng zingah hian Mizoram chuan leimin leh thlipui hi kan tawrh nat ber a ni awm e.

Kan hriat angin Mizoram chu tlangram a ni a, ruahtui tlak tamna hmun a ni bawk. Hei vang hian kumtin ruah tui a tam chuan leimin hmun engemaw zatah a awm thin a, hei hian nasa takin harsatna min thlen thin a ni.

Tun kar maiah pawh ruahsur nasa avangin Mizoram hmun hrang hrangah leimin nasa tak a awm a, inkalpawhna kawng pawh hmun tam takah a ping a ni. Chumai ni lovin leimin vangin mi 30 chuang teh meuh mai an boral a, heti khawpa tum khata leimin vanga thihna thleng hi kan tawng khat hle niin a lang. He thil hi Mizoram mipuite min bengharhtu ni se a duhawm hle.

Mizoram hi ruahtui tlak tamna hmun 'monsoon area' a awm kan nih avang hian kan in sak dan pawh kan uluk a ngai hle mai a. Kan inhumhimna tur leh chenna tur in sak dawnin mi tam takin mithiam rawnna chang kan hre thin lo hi thil pawi tak a ni. Kan in sakna tur hmun chu a him em tih te, engtia sak tur nge, a leilung dinhmun enge tih leh thil dangte mithiam rawn chunga hmalak a pawimawh hle. Hmun tam taka leimin leh chhiatna thleng hi chu kan tui paih dan dik lo leh kan insiamchawp an ni a. Kan ram a pelh chuan kan duh tawk mai zel te hi a pawi tak zet.

Chhiatna thleng tam tak hi fimkhur chuan a pumpelh theih a. Chuvangin mithiam ten hmun him nia an sawiah chauh in sa zel thei ila a duhawm hle. Aizawl bikah pawh khawpuia roreltu Aizawl Municipal Corporation hian khauh leh zuala in sak phalna permit hi a pek a ngai hle, chumi a nih loh chuan vanduaina mangkhawng kan insiambelh zel tihna a ni dawn a ni.

Kuminah furpui em kan la thleng lo chunga ni 2/1 lek ruah surah heti zat chhiatna a thleng leh vanduaina tawk an awm hi a pawi tak zet zet a. Kan hma lawkah ruahtui tam hun fur pui kan thleng leh dawn a ni. Chuvangin fur lo thleng turah sawrkar hi nasa taka a inpuahchah a a ngai a, chutiang bawkin mipui pawhin kan zavaia himna atana hma kan lak a ngai tih hre thar leh ang u.