Tunlai hian Bangladesh ram chhunga kan Zohnahthlak hnam te chu Bangladesh sawrkar leh Arakan Army te hlauin Mizoramah mi engemaw zat an rawn raltlan a. Mahse mi thenkhat erawh ramri vengtu Border Security Force (BSF) ten luh an phal loh avangin an rawn lut thei lo a. Vanduaithlak tak maiin Mizoram rawn luh tum zinga Pastor pakhat phei chu a boral hlauh mai a, hei hian mipui rilru a ti na hle a. Central YMA huaihawtin raltlan ten Mizoram an rawn luh ngei theihna atana sawrkar laipui auh eih nan punkhawm huaihawt a ni a, mipui thlawp a hlawh hle.

Hetia rorelna hrang hrang hnuaia kan awm mek lai hian harsatna hrang hrang te kan tawk fo mai a. Kan hnung deuh khan Assam lamah chuan kan Hmar unau te leh hnamdangte an intihbuai avangin mi engemaw zat chu Mizoramah raltlanin an rawn awm a. Chutiang zelin Burma ramah sipai sawrkarin harsatna a siam avangin kan unau mi engemaw zat te rawn tlanchhia in tun thlengin an la awm bawk a. Tunhnaiah lah nise Bangladesh atangin an rawn raltlan bawk a. Tuna la buai lo nia lang Tripura, Meghalaya leh Manipur lamah te pawh buaina engemaw a awm anih chuan an inpui leh an rawn raltlanna tur, an inhumhimna tur chu Mizoram hi a ni lo thei lo a ni.

Mi thenkhat chuan kan unau raltlan te hi kan ngaimawh lek lek em ni aw a tih theih. Kan unau raltlan zinga thenkhat chu ruihhlo leh sualna lama inhnamhnawih te an awm a, hei hi kan ngaimawh chhan ber ni te pawhin a lang. Mi engemaw zat zingah hi chuan misual hi chu an inzep lo thei loah ngai ila, tute emaw misual vanga an zavaia hmer thin erawh a remlo ang. Misual chungah chuan dan in ro a rel mai tur a ni.

Mizoram pawh hian kan hmalam hun kan hre lo a, hetiang hi tawk ve thei tho kan ni. Kum 1966 a Mizoram a buai kha chuan kan pi leh pu te kha sahimna zawngin Burma leh India ram state dangah te tlanchhia in duat taka lo enkawl an ni a, mi engemaw zat phei chu an awm hlen hial a ni. 

Kan unau Myanmar raltlante tan vehbur te khawnin an chenna in tur te kan buatsaih sak a. Tunah pawh Bangladesh atanga himna zawnga lo lut te tan kan theihtawp kan chhuah mek te hi a ropui a, kan tanrualna hian sawrkar laipui pawh a ko eih ngei turah ngai ang.

Tunah hian kan unaute hian harsatna tawkin an Jerusalem, Mizoramah an rawn tlanchhe mek a ni a. Heng kan unau, kan thisen zawmpui te lo tuamhlawm hi kan tih tur dik tak a ni a. Thlamuang taka an khawsak zel theihna atan hian tan kan lak zel a, kan unaute tana inpui nih zel hi Mizoram mipuite mawhphurhna a ni e.