Mizoram chuan November ni 7,2023 (Thawhlehni) khan kum 5 chhunga kan ram roreltu tur kan thlang a. Muallungthu tih loh hmun dang zawngah chuan vote thlak that ngai leh buaina lian sawi tur awm lovin muanawm takin inthlan kan zo thei a, a lawmawm tak zet a ni.

Inthlan hi thil buaithlak leh hautak zet mai a ni a. Sawrkar pawhin sum leh pai tam tak a seng a, state rethei tan deuh phei chuan inthlan hi retheih phah rawkna tham a tling hial a ni.

Kumin 2023 MLA inthlanpui chu political party leh mipui ah pawh beisei aia hma in Election Commission of India in a ti hma kan ti tlang vek a. Inthlan puan leh vote thlak a inhnaih lutuk hian min barakhaih tlang a, mipuite lo rindan chuan November thla tawp emaw December thla tira inthlang turin kan inbuatsaih niin a lang. Hetia inthlan tih hma anih takah hian Mizorama inthlanna muanawm leh felfai neih anih theihna atana hma latu Mizoram People Forum leh political party te thawhhona thuthlung ah hian ennawn ngai hlek a awm ta niin a lang a.

Thawhhona thuthlung ah hian 'inthlan puan anih hnu chuan in tin luta campaign (house to house) ang chi chu tih loh nise' tiin ziak a ni a, mahse ECI in inthlan a puan leh inthlanna inkar hi thla khat em pawh a tling lova. Political party hrang hrang zingah an candidate la tifel lo te an awm a, heng ho tan hian house to house campaign a theih loh chuan an dinhmun a chhiat phah thei a ni. Mipui 'voters' zingah pawh mahni biala ding te hmel hmuh ngei duh te an awm a, chung mite leh candidate te inhmu thei lova awm ringawt hi chu a fuh lo a, chuvangin inthlan loawm leh zel turah ennawn a that a rinawm e.

Mizorama inthlanna muanawm leh felfai a awm theihnan dan leh thupek kengkawhtu te, inthlan buaipuitu leh political party hrang hrang ten theihtawp an chhuah a. An hmalakna a fakawm hle. Chutih rual erawh chuan boruak muanawm a awm theihna atan te, sum leh pai senso a tlem zawkna atan leh felfai taka inthlan anih theihna atana Mizoram People Forum hmalakna hian fak a phu hle a. MPF hi awm ta lo se kan ram hian eng boruak nge a tawn ang tih hriatthiam har tak a ni. Hun engemaw lai phei kha chuan inthlan kaihhnawihah silaimu sem te leh invauna ri te a ri hial a nih kha. Inthlanna muanawm leh felfai kan neih theihna chhan hi mipuite tanrualna vang liau liau a ni a, state dang te entawn ni zel tura nasa zawka tan kan lak deuh deuh a pawimawh hle.