EDITORIAL : Inthlan a zo fel ta
![](https://zalen.s3.ap-south-1.amazonaws.com/images/news/1717849936_Editorial.jpg)
India hi democracy ram anih ang ngeiin harsatna dang a awm loh chuan kum 5 danah kan aiawha roreltu tur kan thlang thin a. Kumin pawh hi India rama roreltu tur thlan kum a niin April ni 19,2024 atanga June ni 1, 2024 thlengin thawh sarih a inthlan a ni a. Mi tam tak beisei, national paper leh exit poll a sang viau BJP chu party mala seat la tam ber ni mahse beisei aiin seat an hmu tlem a. BJP hian sang takin hnehna a chan beisei anih laiin an party mal chuan an sawrkar thei dawn lova, an thawhpui NDA te nen sawrkar an siam dawn ta a ni.
Sawrkar laipuia BJP hlang ni lo in sawrkarna an siam tur hi Mizo mipui tam tak chuan lawmawm an ti hle niin a lang a, hei hi a chhan chu BJP hlangin sawrkarna an siam chuan hnam tenau leh kristian sakhaw zuitute tan thil hlauhawm a awm thei niin an ngai a ni. Hei hi a dikna chen a awm a, hneh takin sawrkarna siam ta se India danpui pawh hi an her danglam dawrh mai ang tih hlauhna a lian hle a ni. Mahse tunah chuan party dang puihna lo chuan sawrkar an kalpui thei dawn lo a, engemaw thutlukna liantham siam chungchangah pawh an thawhpuite rawn chung zela an kal a ngaih dawn avangin mi tam tak chu an lawm hle niin a lang. Sawrkar siam hma hauh tangin ministry pawimawh inchuhna boruak a awm nghal niin mi thil chik mite chuan an sawi a, hei hi tak tak anih phei chuan Modiji kaihhruai sawrkar hian eng chen nge a daih ang, a term a hmang zo ang nge term laklawhah inthlanpui hi kan nei leh ang tih chu hun in a la hril dawn a ni.
Mizoramah pawh rorellai candidate Richard Vanlalhmangaiha chu hneh taka thlan tlin a ni a, amah hnaih bertu MNF candidate nen an inthlauhna pawh a sang hle a ni. MNF candidate hi Rajya Sabha MP ni lai leh Parliament lama a chetdan avanga mi tam tak duh em em a ni a, mahse hnehna sang takin ZPM candidate hian a hneh a ni. Hei hian a entir chu Mizorama rorel mek Zoram Peoples Movement-ah mipui ten rinna an nghat tih hi a ni a, MLA inthlan ai mahin ZPM hi an che tha a. MLA inthlana an chaklohna bialah te pawh chakna an nei nasa hle a, Mizo mipui ten Mizoram sawrkar nen tha taka thawkho thei tur MP an duh tih a lantir chiang hle.
Hun hmasa lam deuh kha chuan mipuite hriat danah 'MP pakhat chauh nei Mizoram te ang tan chuan Parliament ah thusawina hun a awm ve thei ngai lo' tih hi a ni a, mahse hei hi a dik lo tih mipui ten an hre chho ta zel a. Parliament ah pawh Hindi a thusawi thei tur MP kan nei a, sawrkar project nawr mai bakah Parliament a Mizoram leh Mizo mipuite tana huaisen taka ding turin mipui ten beiseina sang tak an nei tih hre thar se a duhawm hle.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024