Mizoramah kumin kumtawp hian kan ram roreltu tur MLA kan thlang dawn a, political party hrang hrang te pawh an inpuahchah nasa tawh hle. Kum dang ang bawkin kumin inthlan kumah pawl leh khua ten thilphut an nei chho leh ta neuh neuh niin a lang.

Tunhnaiah pawh pawl leh khaw thenkhat chuan an thilphut tihhlawhtlin nan sawrkar laka nawrh te an huaihawt a, hetiang nawrhna hi kan hre chho tan dawn chauh pawh a ni mai thei.  Khaw hrang hrang ten kan nawr langsar ber ber te chu Doctor leh a kaihhnawih bakah zirtirtu chungchang  a ni a, thildang pawh engemaw zat chu a awm bawk.

Mipui ten mahni khaw hamthatna atana thilphut an neih thin hi an khaw tan chuan phut awm tak a ni ngei ang. Mahse chutih rual chuan Mizoram pum hi ngaihtuah tel ve thin se a tha hle mai. Sawrkar sum harsatzia te, hnathawktu indaihlohna te hrereng chunga hmalak ni fo thin se a duhawm hle. Doctor te pawh hi sawrkar chuan lak thar a, thingtlang lama thawk tura dah te pawh a tum thin a. Mahse Doctor kan la tlem bakah mi tam takin thingtlang lama awm ai chuan mahni inlum chhuahsan lova private damdawi ina thawh duh zawk tam tak an awm a, sawrkar tan pawh a buaithlak chang a tam thin. Hetiang kara an chhuahsan tur khuaa an aiawh dah loh vanga harsatna siam ringawt zel ang chi te hi tih loh a tha hle. 

Kan mamawh leh duhna avanga inthlan dawn denchhena politician te kan nawr vak mai leh engemaw intiamna kan neih tir fo te hi thil tul lo tak a ni a. An tih hlawhtlin theih loh emaw kan duh anga hma an la tawk lo nia kan hriat chuan anmahni beihzui nan te kan hmang zui leh si thin.

Politician te pawh hian an tih hlawhtlin theih loh tur leh a tel lova awm hram hram theih ang chi ah hi chuan intiam lo thei se a duhawm hle. Vote duh luat vanga tih theihloh tur thleng thlenga tiam te an awm thin a, an thil tih hi anmahni vawlettu a ni duh hle tih an hriat a pawimawh.

Engpawhnise, inthlan hmachhawn mai tur kan ni a, party hrang hrang ten theihtawp an chhuah leh ngei ang. Chutih hunah chuan political party te pawh an tih hlawhtlin theih loh tur ang chu intiam lo se, mipui lam pawhin anmahni dang chepa intiamtir ang hi chu tih tir lo hram ang u.