India ram chuan kum 5 danah kan aiawha roreltu tur kan thlang thin a. Kumin hi kum 5 dana neih thin inthlanpui neih kum a lo ni leh ta a, nimin piah maiah Mizoramah chuan Member of Parliament (Lok Sabha) vote thlak a ni a. India ram hmun dangah chuan inthlan ni hian buaina nasa tak a chhuah chang a tam mai a, hmun thenkhatah phei chuan thihna hial te a thleng thin a ni.

Mizoramah pawh inthlanpui hi hun hrang hrangah kan nei thin a. MP, MLA, Corporator leh Local/Village Council te kum nga danah kan thlang thin a ni. Heng zingah hian MP inthlan hi kan ngai pawimawh lo ber niin a lang. Kumin inthlanpui ah hian political party hrang hrang, Mizoram Peoples Forum, tlawmngai pawl leh sawrkar thuneitu ten vote thlak tha turin mipui an sawm a. Mahse heti chung hian vote tla erawh a tha lo hle thung. Vote tlak that loh chhan hi engvang nge tih ngun taka ngaihtuah a, vote tla a that zawk theihna tura tanlak a pawimawh hle mai.

Heti tak maia Lok Sabha inthlanpui kan ngaih pawimawh tawk loh chhan hi MP kan neih tlem vang te, kan MP neih chhun ah hian tu pawh tling se sawrkar laipui ah 'Aw' kan nei tawk lova hriatna te, MP hi mipui ten direct taka kan dawr theih loh thin vang leh chhan tam tak a awm ngei ang. Mizoram in Lok Sabha MP inthlanpui kan neih atanga tun tum inthlan thleng han chhuikir hian kan ngaih pawimawh tawk loh zia a lang chiang hle awm e.

Vote a tlak that theihnan hian sawrkar chuan pisa chawlh ni atan a puang a, chumai ni lovin hnathawk ruaitute pawh hemi ni hi an hnathawk te tan hun remchang siamsak tur te'n an ti bawk a. Mahse heti chung hian sawrkar hnathawk zingah pawh vote thlak ngai pawimawh lem lo an tam hle niin a lang a, mipui zingah pawh eng tehuala ngai lem lo, vote thlak lo mai mai an tam hle bawk.

MLA inthlanpui hi chu mipui mimir nghawng nia kan hriat vangin kan ngai pawimawh a. Thingtlang lam cheng, Aizawl a lehkha zir leh hnathawka awm te pawhin mahni khua ah vote thlak ngei an tum a. Political party leh candidate te pawhin sum leh pai ui lovin an haw na tur thlengin an ngaihtuah sak thin a ni. Hetiang boruak hi MP inthlanah hi chuan a awm lo a, mipui an phur loh bakah political party te pawhin an ngai pawimawh lo deuh niin a lang. Inthlan hi democracy ramah chuan thil pawimawh ber zinga mi a ni a, kum 5 chhunga kan aiawha roreltute thlanna hun a nih avangin hun lokal zel turah chuan mipui ten ngai pawimawh leh zual thei ila a duhawm hle.