Kan hriat theuh angin kan hma lawk April ni 19,2024 ah Mizoram chuan Lok Sabha MP kan thlang dawn a. He inthlanna lo awm turah hian party hrang hrang leh independent a chuh tum te chuan theihtawpin hma an la mek a. Mizoram hian tum dangah pawh inthlan kan lo hmachhawn fo tawh a, inthlanna fel fai leh muanawm kan neih avangin ffak pawh kan hlawh hle thin a ni.

MP inthlan lo awm tur atan hian Mizorama kohhran hrang hrang hruaitu inzawmkhawm 'Mizoram Kohhran Hruaitute Committee' chuan tunhnai khan nn thuchah ti chhuakin inthlanna fel fai a awm theih nan hel pawl leh ralthuam lam chi kaihhnawih hmang lo tur te, vote nei chin chuan vote thlak vek tur te, hnam bil ang zawnga vote zawng lo tur te, mimal insawichhiatna ang chi ti lo tur te, therhlo leh sum it vanga vote hralh lo tur te, kan ram, hnam leh sakhaw himna ngai pawimawh tur te in mipui leh political party te chu an ngen a ni. Mizoram Kohhran Hruaitute Committee ngenna hi a zahawm a, an beisei ang ngeia ti hlawhtling tura tan kan lak a pawimawh hle.

Mizoramah inthlanna muanawm leh fel fai a awm theihnan kohhran hrang hrang leh tlawmngai pawl aiawh te chuan Mizoram Peoples Forum (MPF) dinin theihtawpin hma an la reng a. An hmalakna hian awmzia thui tak neiin mipui leh political party te pawhin kan zawm tha thawkhat hle a, tun aia nasa lehzuala MPF thu leh hlan kan ngaih pawimawh zel a pawimawh. Muanawm taka inthlanna neih leh mipui a tam thei ang berin vote an thlak hi Election Commission of India duh dan pawh a ni a, dik taka thiltih anih theihnan dan leh hrai pawh thahnem tak a duang a ni.

MPF leh ECI te hian political party leh mipui tana tha ber tur nia hriat dan hrang hrang an zam te hi kan zawm a pawimawh hle a. Heng an dan zam te hi mi dik tan chuan a hnawk lova, a ruka engemaw tih tum tan erawh chuan a hnawk hle thung ang. Dan kan zawm tlan hian kan khawtlang a nuam a ni mai a, dan a lal lohna hmun chu hmun nuam a awm ngai lo a ni. ECI leh MPF thu leh hla ngaimawhtu hi an rilru a dik lo tihna a ni.

Mizoramah tum engemaw zat inthlan kan lo hmachhawn tawh a, chung kan inthlanna neih tawhah te chuan a zavaiin a fel fai bik hauh lo ang. Mahse India ram state danga inthlan ai chuan a fel fai a, buaina leh harsatna thleng te a awm lem loh avangin Election Commission pawhin min fak hle anih kha. Chuvangin kan hma lawka inthlan lo awm tur pawh hi inthlanna muanawm leh fel fai, state dang te entawn ni zel tura kan neih a pawimawh hle.