Kumin kumtawpah harsatna dang a awm a nih loh chuan Mizoram chuan kan rama roreltu tur Member of Legislative member kan thlang dawn a. Party hrang hrang ten an candidate tur te an tifel chho mek zel a. Party lian pahnih rorel lai Mizo National Front leh eptu Zoram Peoples Movement chuan an candidate tur an puang tawh a. Party dang te hian la puang chiang chiah lo mahse a awm ang tur chu a hriat deuh ruak tawh a, campaign pawh an bei tan mek a ni. Tum dangah chuan inthlan puan anih hnuah political party ten an candidate tur an ngaihtuah tan a, kumin erawh inthlan puan hma hauh atangin candidate puan a ni tawh a, a dangdai hle.

Mizoram hi Kristian ram kan nih vang te, tlawmngai pawl thiltithei tak kan neih avang leh mipui ten thu kan awih avangin kan inthlan pawh a thianghlim a. Election Commission of India pawhin a fak a, State dang te pawhin min entawn nasa in state thenkhat atang phei chuan zirchiang tur an lokal hial a ni.

Inthlanna thianghlim leh fel fai kan neih theihna atan hian Mizoram People Forum chuan hma a la thin a. Anni mai bakah kohhran mal te, tlawmngai pawl hrang hrangte pawhin inthlan thuchah siamin muanawm taka inthlan neih anih theihnan thuchhuah te an siam thin a. An thuchhuah te mipuiin an zawm that vangin hmun danga harsatna chi hrang hrang mi aia vote thlak, tharum thawhna thleng leh harsatna dang thleng ang chi te Mizoramah chuan a thleng ve ngai lo a ni.

Kumin kan inthlan turah pawh MPF leh political party te chuan inremna siamin muanawm leh felfai taka thawhho dan tur an duang a. He inremna hi MPF leh political party te duhdan zui a siam a niin party hrang hrang president ten an pawmpui tih entirnan hming an ziak vek bawk a ni.

Inthlan hun puan anih hma hauh atangin party tin te an tang hle a, an tan luatah inremna pawh hi bawhpelh theih a ni a. Chuvangin he inremna ang ngeia party te an kal theih nan MPF hian theihtawp a chhuah a pawimawh hle. Tun atanga khauh taka he inremna hi kenkawh a nih loh chuan nakin lawkah inthik leh engemaw bawhchhiat awm thei a ni a, chuvangin strict taka kenkawh a pawimawh hle. Chutih rualin party hrang hrang te pawhin an inremna a ni tih hria a, ti hlawhtling ngei tura hma an lak hi an mawhphurhna a ni tih an hriat thar leh a pawimawh hle.