International Tourism Mart tum 10 na chu nizan khan R. Dengthuama Hall-ah leh AR Lammual-ah a tiak a, mipuiin an hlut hle a, he hun inpho te pawhin hlawh thlak an ti hle a, International huap a nih rual erawh chuan ram dang leh state dang atanga rawn inpho an awm mumal loh avangin a kokim lo deuh chuan a hriat a, mahse, zan thlenga Aizawl Traffic dinhmun zawng zawng ngaihtuahin a hlawhtling hle tih a hriat.
 

He International Tourism Mart-a thil zawrh dan kalphung erawh a inang lo. He hunah hian thil chi hrang an zuar hnem hle a, ei leh in lam pawh a hnianghnar viau a, restaurant tam taka hmuh mai tur awm lo ang te pawh hmuh tur a awm nual a, naupang tana han inawmtleina tur thlengin a awm a, hmai chei tir turin thui tak tak an intlar, chutihlaiin mahni thla lo ziah tir pawl lah bo lo. Chutihruala ka sawi duh ber zawk chu dawra inpho te thil man chhiar dan kalphung kha a ni.

Mahni bungraw zuar zingah a man pangai aia tlawm a he hun denchhena an thil zawrh te titlawm an awm laiin, a man bithliah sa aia thil man ti to zawk an awm tlat kha hriatthiam a har a, a buatsaihtute lam hian heng thil zuar te thil zawrh dan turah khan kalphung an dung lawk lo ni berin a lang, a fuh tawk lo deuh niin a hriat. Ei leh In lam pawh dawr pangngai aiin thil ei man a to deuh zel bawk. Sumdawng te tan erawh hlep tam zawka inhralhna hun a nihna chen a awm thei ang a, chutihrual chuan mahni duh zat zata thil hralh kha a fuh berin a lang lo thei.

International Tourism Mart, India hmarchhak te inthlenchhawk tura sawrkar laipuiin thil a buatsaih thin, state hrang hrang ten kan inthlenchhawk thin a,tun tuma thil lawmawm tak nia lang chu thei lam sawngbawlna lamah Mizo te kan hniam lo hle tih a lang a, thei chi chi hrang hranga sawngbawl lei tur a tam a, a bik takin in tur lam chi sawngbawl kawngah Mizote kan duai lo hle tih a hmuh theih a, ram dang mi te hmuh atan pawh zahpuiawm lo leh lei chakawm takin an thilsiam an phochhuak kha a lawmawm. Chutihrual thil phochhuah tam takah a man zat intar lo hmuh tur a awm nual, kha a fuh lo hle.

He hun hman a nih chhunga rimawi leh zaia mipui awitu an awm reng mai khan he Tourism Mart hi a tihlawhtling a tih theih a, khang zaithiam te leh musician te lo awm kha a chhimtu mipui te min tizangkhai a, a programme pawh a ti changtlung hle a, a buatsaihtute lam pawh an fakawm hle.