Aizawl kha - hmar lam atanga rawn nawrte khan Jail, Thana, Bazar Bungkawn thlengin ti mai ang MNF control hnuaiah a awm a, chhim lam chuan DC office thlanga Treasury khi an thleng ni tain ka hria. Chutih lai chuan Jail chu tuna Millenium Centre kan tihah khian a awm. Jail tâng an chhuah tak siah chuan rilru kim lo Non-lunatic criminal leh Lunatic criminal te pawh chu mahni chhuah chhuahin an chhuak ni tur a ni. Ka la hriat reng chu - khawthlang lam pa pakhat - mahni bupui leh fate hmu rulngan leh a ni chek ang, hmai chim buaihin a vaw bawk. Chu mai ni lo NCL an tih Thianghlima, tlangval hmeltha deuh, Saitual lam mite chu jail atanga chhuak ka hriatte an ni. Thianghlima phei hi chu tawng mai mai lo a ni a, vai sipaiin an man a, an be tawng zo si lo a, spy emaw te pawh an ti a ni awm e - Nowgong jail thlengin kan tangho ta a ni. Engle khaw le, Assam Rifles ram chin chu chhuh pakhat te mah, Aizawlah chuan an nei lo ni maiin ka hria. Nakinah ka tan ve hnu lamah Aizawl chanchin chu ka la ziak leh ang, indawt deuh a ngai si a. Tichuan, Serlui hnar atang chuan kan chho ve ta a, Samtlang (Khawchhete) kan han thlen chuan Pu R.Thanhlira te nupa te, Upa Vanchuanga te pawh an lo hawihai ve nasa mai. U Thanhlira nupui U Hmingliani chu a hah ngang a niang, “Hei bak hi chu ka kal tawh dawn lo, ka hah lutuk, thih a nih leh hetah hian ka thi mai ang,” a lo ti tawn tawn a. Keiniho chuan a chhangchhia a chhangchhiain Khawrihnim lam kan pan ta a, kan la chhangchhe nawi nasa si, Project phei an tiha kan han kal pheite chu - ka fapa naupang ber dawttu, kum 3 leh thla 4 mi emaw chu ka phur chungah ka’n hlang a, min khawngaih ve si, “Ka pa, ka kal thei,”?tiin a han chhuk a, a kal hlek chuan hruichun hrui a pal a, a tlu leh hnak thin, ka chhuang leh thin, kan kal chak thei mawlh si lo a. A?tawpa tawpah Tlawng kan zuk thleng ve thei ta hlawl a, kan aia chaka kalho chu thute ka chah a, Hliappui kawng lamah kan chho ta zel a, chhak deuhah chuan min chhawk tur kan unaute pawh lo thlengin kan zâng ta hawk mai. Khawrihnimah chuan - chhungkaw thum kan nih avangin in thumah kan insem darh a. Khanglaite kha chuan Khawrihnimte chu a la thingtlang khua lehchhawng a, uihli te a tam hle. Kan fate lah chuan enga mah an la thlei thiam si lo, chaw ei laite hian, “Ghee min chawm rawh u,” te an han ti leh lawk thin. Sipaiin an la rawn thlen phak loh avangin kan thlamuang hle. Khawrihnimah chuan kan cham ta a. Keini chu sawrkhar hnathawk kan nih avangin March ni 9, 1966 khan tu tu emaw chu Aizawl lamah kan chho leh ta a. Mel thum kan thlen chuan tute emawin, “Flag vâr pu ula, engtin mah an tih lo ang che u,” min ti a, hmawlhtang sei deuhah rawmawl vâr kan tar a, Kulikawn kan han lut ngak ngak mai chu a tlawmthlak teh a nia aw! Sikulpui kawna mi in luah ka nih avangin, New Street chhoa ka kalte chu KHAW RAM kan fang hi a ni ringawt mai a, a laihawl vel ka thlen chuan thlengpuiah hian vawksa, a thau tâl tha deuh mai hi tâl hnih tâl thum a lo awm reng ma. Kha - tu tlansan ni maw? A street chho reng reng kha mihring hnuhma awm hek lo, hnahthel nen a ram ngawih ngawih mai a ni. Tichuan, keimahin ka khawsa veleh ta a, Sikul kawn velah chuan sipai an rak khawp mai. Fel deuh an awm a, hel laka intisipai tak, mi vau titiha bucket min han laksak duh maite pawh ka tawk. Thenkhat erawh chuan, an ram (India ram state)-a an chhungten an lo tawh tawhte a nih vangin min lainat hle. Office lam ka va pan a, kan Civil Surgeon Office chu a lo kang mam pak mai chu niin. Hospital lama khawimaw lai hmun awl deuhah kan inhnawh ve ta a. File chu kan theih theih angin DC lam atangtein kan zawng khawm a. 5/6 vel chu kan han hawng ve thei ta a. Thil dang tih vak theih hek loh, Staff Welfare chu kan hnapui ber a ni. Khatih lai khan Mizoram pum hi Civil Surgeon chan a ni mai si, Lunglei lah Sub-Divisional Medical & Health Officer hnuai mai a la ni a, Drawing & Disbursing Officer a nih bak kha power tehchiam a nei lo, Siaha lam thlengin kan buaipui thin a, communication dang a chah takah chuan W/T (Wireless transmission) Assam Rifles ta kan hmang hlawm a. Staff Welfare kha tul hmasa ber a ni. Kan office pawisa dahna Chest chu chabi a awm si lo, MNF-in kan Head Clerk an chhuhsak avangin. Hawn mai theih a nih loh avangin a hnung lam atangin Mechanic-in Cheniin a chik hawng ta tawp mai a, kan han hawn meuh chuan pawis apali (one anna bit) - 6 naya paise a lo awm ngât mai a ni! Kan Civil Surgeon Phani Bora MB hnena kan in-report ni chuan kan Head Clerk, Durtlang lal fapa, C.H.Liana chuan MNF-in a Cash Box chabi an chhuhsak tihna an receipt pawh a rawn hmuh ve bawk. Chutih lai chuan Baktar Majumdara, SDO, PWD Head Clerk a awm ve bawk a. Ani pawh chuan chuti ang receipt bawk chu a rawn phawrh ve nghe nghe a ni. Tichuan, kan theih ang angin Office chu kan run ve a, khawii lai pawh hi a ti em em vek mai a ni, sipai an lal hle, Assam Rifles phei chu kawlh tak an ni. Ni 31-3-1966 chuan Office-a ka thawk lai chu Assam Rifles 6 emaw an lo kal a, “I u-in a be duh che,” tiin chhuanlam nep lutuk siamin min rawn man ta a ni. Assam Rifles Quarter guard-ah min dah nghal a. Ka luh chuan anmahni Assam Rifles civilian clerk ngei, RALLIANA chu an rawn man thla bawk a. Ani an man chhan nia ka hriat tak chu, MNF sipai hotu lam hming lang tak Ralliana a awm bawk a, an hming a inan takah chuan an rawn man ve ni maw ka ti mai. Sipaihoin mi an man dan kha a mak angreng - Upa Chalhnuna te, C.Hualkunga te angte kha an rawn la nawk nawk mai. Mahse, anni Kohhran khaipa kha chu Pu Robert-an a rawn chhanchhuak leh ta a ni.