Khawvelah khuarel chhiatna chi hrang hrang tuilian, leimin, kangmei, thlipui leh lirnghing te awm a. Heng chhiatna thleng thei zingah hian tuilian, thlipui leh lirnghing lian tham hi Mizote hian kan tawk tam lo hle a, chutih laiin leimin leh kangmei avang erawh chuan kum tin chhiatna leh vanduaina thleng hriat tur engemaw zat a awm thin a, a pawi tak zet.

Kuminah pawh ruah tui a hul tawhin khua a ro tan a, hmun hrang hrangah kangmei vanga chhiatna thleng sawi tur a awm leh ta nual mai. Hriattheih chinah kumin hian Mizoramah kangmei vanga nunna chan sawi tur la awm lo mahse in kang erawh hriat tur a awm leh ta nual mai thung a, a pawi tak zet a ni. Zep nak emaw Mizoram hi tlangram a ni a, kan insakna tam tak hi hmun awih leh rem lo tak tak a ni bawk a. Kangmei a chhuah thulhah pawh rukrum thila tlanchhuahna tur (emergency exit) kan ngai pawimawh tawk lo nen vanduaina a lo thlen palhin nunna chan sawi tur an awm fo mai a, a pawi hle.

Sap ram kan tih leh hnam changkang zawkte chuan engemaw vanduaina lo thlen palhah sahimna zawnga tlanchhuahna tur hmun remchang hi an siam thin a, Mizote erawh chu helamah hian kan la harh lo hle thung. Kangmei a ni emaw chhiatna dang laka invenna tur leh tlanchhuahna tur hmun kan siam thin loh avangin nunna hlu tak chan sawi tur an awm fo mai a. Kan kawngkapui lama kangmei leh chhiatna lo thleng palh ta se bel chhunga sa ang mai kan ni a, chuvangin helamah hian kan harh thar a pawimawh tak zet.

Mizorama chhiatna thleng tam tak hi chu kan in siamchawpte a ni a. Kangmei chhuah chhan bera kan puh electric kal sual tihte pawh hi kan fimkhur leh uluk loh vanga thleng ani duh hle. Tunlaiah chhungkaw tam takin kan inah ar kan vulh a, kan ranvulhte ti lum turin electric chhit sak an ngai thin. Chung kan tihnaah te chuan mithiam leh chinchang hre zawkte rawnna chang hre lovin kan remchang ang anga tih mai ching kan awm thin a, hei hian mangkhawng min siamsak fo tih kan hriat thar a tul hle.

Hei mai ni lovin kan vawk chaw chhumna atang te, mei bung paih fimkhur loh avang te in chhiatna hi a thleng fo a, kan fimkhur a pawimawh hle. Leimin, thlipui leh chhiatna thleng thenkhatah hian chuan an sulhnu khawm theih engemaw zat a awm thin a. Chutih laiin kangmei erawh chuan hnutchhiah a nei ve thin lo hi a hualthlala lai a ni. Thal a ni chho zel dawn a, chuvangin chhiatna nasa zawk a thlen loh nan tun atangin chhungtinte kan fimkhur leh zual a pawimawh hle.