Khua a thal chho leh ta hle mai a, kum dang ang anih chuan khua ruah tui hi a la tla mai dawn lo niin a lang. Tunhnaiah Mizoram hmun hrang hrangah kangmei vanga in kang ral leh ram kang hriat tur a awm ta fo mai a, a pawi hle.

Kuminah pawh in kang ral hriat tur a awm ta fo mai a, a pawi tak zet a ni. In kan chhan tam ber nia sawi chu electric kalsual vang te, ar vulhna atang te, mei tih mih loh vang leh bati chhit atang te in a ni.

Mi tam berin in kan chhana kan puh electric kalsual hi a ni meuh em tih te pawh zawhna awm thei a ni a, thiamthu sawi ve thei lo electric hi kan puh mai thin em tih mai awl tak a ni. Engpawhnise hei hian a entir chu kan in te mithiam kaihhruaina in wiring tha taka tih a pawimawh a, kan hman theih bak power supply hmang lo bawk ila electric kalsual vanga kangmei chhuak hi a pumpelh theih dawn a ni.

Hei mai bakah ar vulhna atang hian kangmei a chhuak fo a, fimkhur a ngaiin uluk taka enfiah fo a tha. Chumai bakah mei tih mih that loh avang leh bati chhit atangin kangmei a chhuak fo tih hre bawk ang u. Ram kang a awm chhan ber pawh hi ramvak ten mei an tih mih that thin loh vang a ni bawk.

Kangmei a chhuah a, in kang te a awm changin kangthelhtu ten harsatna an tawh thin chu mipui pungkhawm hi a ni fo. Mi tam takin tangkaina nei lem lovin ennawm thlira lo thlir a, hnathawktute chetvelna tibuai an awm thin avangin duh angin hma an la thei thin lova, hei pawh hi sim a tha khawp mai. Tanpuitu a kan tang thei lo anih pawhin harsatna siamtu ah chuan tang lo hram ang u.

Kangmei vanga chhiatna hrang hrang thleng te hi engemaw vanduai hrim hrim vang chu awm bawk mahse a tam ber hi chu fimkhur loh vanga thleng niin a lang a. Chuvangin fimkhur taka kan khawsak chuan kangmei hi a pumpelh theih a ni tih hriain nasa leh zuala fimkhur zel i tum ang u.