Mizoram hi ruahtui tlak tamna rama khawsa kan ni a. Kum tin ruahtui kan dawng nsa hle a, ruahtui a tlak that kum phei chuan leimin leh tuilian pawh kan tuar nasa ve thin hle. Kuminah pawh fur kan hmang mek a, ruahtui a tamin inkalpawhna kawngpui chhia pawh hmun hrang hrangah sawi tur a awm nual mai.

Mizoram hmun hrang hrangah kawng chhia sawi anih laiin mite sawi uar zual leh kawng dan hial chu Tlabung kawng leh Mamit lam kawngpui hi a ni mai awm e. Kan kawngpui te hi kan chak lakna ber a ni a, kawng a that loh chuan mipui ten nitin mamawh lakna kawngah harsatna kan tawk a. Lirthei in a tuar a, zin mite tan a buaithlak a, harsatna hrang hrang a thleng thin a ni.

Mizoramah sawrkar hmalakna in hmun hrang hrangah kawngpui laih mek a ni a, thil lawmawm tak anih rualin kawng laitute hian mipui min ngai pawimawh tawk lo deuh em aw tih mai a awl hle. Kawng laih chhung chuan engemaw chen mipui ten kan tuar dawn tih kan hria a, kan inhuam ve pawh a ngai. Chutih rual erawh chuan Mizorama kawng laih hna thawktute erawh chuan mipui harsatna hi an ngai pawimawh tawk lova, anmahni remchan dan leh hlawk dan chauh an ngaihtuah ni mai hian a ngaih theih rum rum hial ta mai.

Kawng laitute hian a remchan dan ang angin leivung an paih a, kan rama nungcha, thing leh mau ten an tuar a. Session neih zawh tak maiah pawh company te leivung paihin kuthnathawktute harsatna a thlen thu sawichhuah a ni ta hial mai. Hmasawnna a thlen dawn chuan tawrh a ngaih chang a awm, mahse hmasawnna min thlentute hian mipui harsatna tawh te hi an hriat tel ve a ngai.

Mizorama kawngpui te a tlo lo leh a chhe hma em em mai te hian ngaihtuah a ti thui a. Kawng siamtute hian hmanraw tha an hmang lo nge a nihna tur ang takin an thawk lo zawk? Kan ram kawngpui te fur khat emaw lek hnua a chhe leh mai thin te hi enfiah nise a duhawm hle. Kawng chhia vanga lungawi lo an awm te hi an thlirna atang chuan a dik em em ang tih a rin theih a. Chutih rual erawh chuan kan lungawi-lohna hi mipui tawrhna thlen zawngin ni lo se, thuneitu lam pawhin tanlak thar a ngaih zia hriat nan hmang thei se a duhawm hle.