Mizoram chak lakna kawngpui ber Silchar kawng kan tih mai chu a chhiat avangin Mizoram Truck Owners Association leh Mizoram Truck Drivers Association-te chuan siamthat anih hma chuan ni 23.1.2025 atanga tlan loh nise an ti a. Mahse sawrkarin hma a lak tak avang leh hmalak chhunzawm zel a tum avangin ni 2 emaw chauh an tlan loh hnuah dan pangngaia tlan chhunzawm leh an rel a ni.

Tun dinhmunah chuan Mizoram hian Silchar kawng kan tih mai national highway hi kan mamawh zawng zawng deuh thaw kan lakna leh kan hralhna hmun a ni a. Ni 2/1 leh pawh kawng chhia se kan buai nghal zel mai. Tun tuma truck neitu ten lungawihloh an lantir chhung hi a rei lo em mai a, tun ai hian rei deuh se chuan nitin mamawh chi hrang hrangah harsatna kan tawh hman hial a rinawm a. Chuvangin helai kawng hi chu a bik taka enkawl leh repair reng hi a pawimawh zual a ni.

Tun dinhmunah Mizorama kan kawng neih ang ang te hi State dang kawng te ngaihtuah chuan an tha tawk lo tlangpui a, kawng siamna atana kan hmanraw hman te pawh a tha tawk lo niin a lang. Mi tam tak in tlangram leiminna hmun, ruah tui tlak tamna hmun kan nih avanga kan kawngpui te hi tlo lo ni ten an sawi thin a. Hei hi a dikna chin pawh thui takin a awm ngei ang, chutih rualin India ram hmun danga tlang ram ve tho leh ruahtui tlak tamna hmun dang te han ngaihtuah ila, keini ai chuan kawng hi an nei tha zawk tlangpui a ni. Hetia tlang ram leh ruahtui tlak tamna hmun, State dang ten keini aia kawng an neih tha zawk hian chhan a nei ngei ang. Chuvangin, sawrkar leh engineer te pawh hian kan kawng tlo loh chhan hi hriatchhuah an tum a, a damdawi tur an ngaihtuah ngei a tul tak zet.

Tunlai hian PWD chuan Mizoram hmun hrang hrang ah kawng thawm that hna an thawk mek a, mahse sawrkar sum harsat vang nge, Aizawl leh hmun danga kawng thawm that te hi major repair ni lovin engemaw a chhe lai siam that hlek hlek chauh niin a lang a. Heti anih chuan rei lo te ah a chhe leh nghal mai dawn tihna a ni. Tuna kan kawng siamdan ang hi chuan furpui hmachhawn hi a huphurhawm hle a, kumin hi Mizoram kawng chhiat ber kum a ni lovang tih pawh sawi a har hial a ni. Mizoram chak lakna ber Silchar kawng hi tun ai hian ngaihsak leh zual nise. Kum tin mai deuh thawa siam a ngai ziah mai leh harsatna min thlen fo mai pawh hi pumpelh dan zawn ni se a duhawm hle.