Chief Minister Lalduhoma chuan sawrkar thar lakluh zawha canchinbumite a kawmnaah a sawrkar chu dik taka kal a tum thu sawiin sawrkar hnathawkte pawh dik taka thil ti tura a duh thu a sawi a. Chief Minister thusawi hi a taka tih hlawhtlin ngei nise a duhawm hle. Chief Minister hian dan dinglai in a hmuh theih tawk (entitle) a pek bak chu beisei a tum loh thu sawiin sawrkar hnathawk te pawh an entitle chinah lungawi se a duh thu a sawi a. An kawl theih bak kawl an awm chuan hmalak a ni dawn tih a sawi.

Hun vawn dik chungchang CM in a sawi pawh hi sawrkar hnathawk te hian zawm se a duhawm hle mai. Mizoramah chuan office hun chhung hi nipuiah zing dar 9 atanga tlai dar 5, thlasikah zing dar 9:30 atanga tlai dar 4 inkar a ni a. Office hrang hrang te hi pisa tan hunah chuan dawr tur an la awm mang lo a, thenkhat tlai tak taka kal an tam thei hle. Chumai ni lovin office ban dawn hnaihah te hian dawr tur an vang duh khawp mai bawk. Office tina biometric attendance khawl dah tum pawh hi a rang thei ang bera tih hlawhtlin nise a duhawm hle. He khawl hi dah anih chuan tunge kal tlai, tunge haw hma tih leh pisa kai hun chhungin tunge office chhuahsan tih te a hriat vek dawn a. Office thawkte tan pawh inthlahdah theih a ni dawn lo a ni.

Office thenkhat chuan an office a thil zuar luh an remti lo a, hei hi chhunzawm zel a tha khawp mai. Office chhunga thil zuar an awm hian hna a ti buai a, hnathawh a sawt loh bakah mipui office dawr te tan harsatna a thlen bawk a ni. Hei mai bakah office hun chhunga inneih, mo lawm, mitthi vui leh inral kan dah thin pawh hi tihtawp a tha hle. Office a thawhpui te an boral anih chuan a vui hunserha lo tel ve chu tihawm tak a ni ngei mai. Chutih rual chuan chhungte thih, chhungte inneih leh birthday lawmna eng ilo vela office a thawk zawng zawng kal thin ang kha chu tihtawp nise. Heng hunah te hian office atangin aiawh intirh mai nise a fuh zawk a rinawm.

Hei bakah pawh Chief Minister sawi angin eng emaw function a khuallian tam lutuk te, harsatna bik a awm pawh ni lem loa 'Ai kal' lak uar lutuk te pawh hi kan tibo thei anih em loh pawhin ti tlem tura tanlak a pawimawh. Engpawhnise thil tha tih kawngah sawrkarna chelhtu Ministry in hma a hruai anih chuan sawrkar hnathawk te chuan an zui mai a rinawm e.