Khawvelah hian khuarel chhiatna thleng thin chi hrang hrang a awm a, chung zingah chuan tuilian, lirnghing, thlipui, tuifawn (tsunami), tlangkang leh leimin te hi a lar zual te an ni awm e. Mizoram hi tlangram a ni a, khuarel chhiatna thleng thin zingah hian leimin hi kan hmelhriat ber leh kan tawrh ber a ni a. A dang te hi chu kan tawng lemlo a, kan vannei hle.

Kuminah pawh fur an ni chho a, kum dang ang bawkin ruahtui kan dawng tam ta hle a. Kan buaina tlanglawn ber chu kum danga kan buaina bawk leimin chungchang hi a ni leh ta a ni. Kuminah pawh Mizoram hmun hrang hrangah leimin sawi tur a tam ta hle mai a, mahse heng leimin te hi thenfai zel an niin harsatna lian min thlen erawh an awm meuh lo a. Hetih lai hian National Highway 54, Aizawl to Sairang kawng erawhin harsatna lian tak min thlenin tunah phei chuan he kawng hi kal theih loha dan (block) a ni ta hial a ni.

Mizoram hi kan vannei a, khawi lai emaw ramhnuaiah te leimin te awm bawk mahse a tlangpuiin leimin vanga harsatna kan tawh hi chu keimahni siam chawp (man made disaster) a ni deuh zel a ni. Kan fimkhur tawk loh avangin heng chhiatna te hi kan tawk zel niiin a ngaih theih a, a pawi hle.

Tuna NH-54 a harsatna kan tawh mek pawh hi a thlang lama in hmun tur lei laih vang hi niin mi tam tak chuan an ngai a. Zawhna awm ta chu helai hmun laih dawn hian AMC ah phalna lak a ni em tih te, mithiamte kaihhruaina hnuaiah hmalak a ni em tih te a ni. 

Aizawl leh khawpui danga in hmun lai te hian lei laihna hmanrua/khawl hi hman tlanglawn berah an nei a, hei hi a awlsam vang bakah senso a tlem vang a ni. Mahse hetih lai hian khawl hmanga lei laih hian nghawr nasa tak a siam a, leilung hi a tinghet lo hle nia sawi te pawh a awm a. Kan lei laih hian mangkhawng kan siam bawk a, hun kal zel turah fimkhur phana atan hman a duhawm hle.

Engpawhnise tuna leimin vanga NH-54 khar an ngai hial te hi a pawi a. Hei hian lirthei veivah kawngah nasa takin harsatna min siam dawn a ni. Hun lo kal zel turah chuan sawrkar thuneitute hian in hmun laih leh thildangah te hian mipuite him zawk nan dan awmsa te hi khauh takin lekkawh zel se, chuti a nih loh chuan harsatna hi kan la hmachhawn zel ang tih a hlauhawm hle.