DOWNLOAD OUR APP

Read latest news on your phone
app-store

EDITORIAL : Kuhva harsatna hi

Nov 06, 2022

Kuhva chungchanga sawrkar hmalakna hi kuthnathawktute hian an duhkhawp lo hle a, tun aia nasa zawka kuthnathawktute harsatna chingfel tur hian a penchhuah a ngai tih hre thar se a duhawm hle

Mizoram khawthlang lam leh hmar lamah te kuthnathawktu mi thahnem takin kuhva an ching a. Heng an kuhva atang hian cheng nuai tam tak an lalut a. Kuhva hi a hralhna kawngah harsatna a awm lemloh avang leh hnamdang sumdawng ten a sen tet lai atanga an lei mai thin avangin eizawnna tha leh hlawk tak a ni a. hei vang hian kuthnathawk tam takin kuhva hi an ching a, an hlawkpui hle ni pawhin a lang.

Tunhnai kum engemaw kalta atang khan khawchhak lam atangin kuhva a lo lut tan a. Heng kuhva te hi Mizoram atanga tharchhuah aia a man a tlawm avang leh a that bawk si avangin Mizoram tharchhuah te chu a luahlan deuh ta hial mai a. Hei vang hian kuhva chinga eizawngte chuan harsatna an tawk tan ta a. Sawrkar chu khawchhak lam atanga kuhva tawlhluh thin chu titawp turin an ngen ta hial a ni.

Mizoram sawrkar pawhin hma lain khawchhak lam atanga kuhva tawlh luh thin chu chhiah chawi lo anih avangin a khap a. Mahse GST hnuaiah dan ang taka chhiah pe in sumdawng thenkhat chuan an lalut chhunzawm ta zel a. Khawchhak lam atanga kuhva lut hi Assam sawrkar chuan a ngaihmawh nia a lan tak avangin Mizorama kuhva chingtute pawhin harsatna an tawk ta niin a lang.

Kuhva chungchanga Mizoram kuthnathawktute harsatna hi a chingfel thei tu ber chu Assam sawrkar niin a lang a. Assam sawrkar hian Mizoram tharchhuah kuhva te chu harsatna awm lova an state paltlang remti anga a insawi chungin vawiin ni thlengin harsatna a la thleng ta zel hi chu a pawi hle a, Assam sawrkar hi a thutiamah a rinawm lo hle tih a lantir a ni.

Hemi kaihhnawih zelah hian Mizoram chhungah pawh kuhva a sumdawng te leh kuhva chingtute inkarah pawh inhriatthiam lohna a chhuak ta lek lek mai a, tunhnaiah pawh lirthei hal leh thildang hriat nuam lo deuh deuh te pawh social media lamah a darh hial anih kha. He thil hi chinfel thuai anih loh chuan nakin lawkah chuan kan ramah hian thisen chhuakin inthahna hial pawh a thleng mai ang tih hlauhawm tak a ni. 

Tun dinhmunah chuan kuhva hralh kawnga harsatna siamtu ber leh a kaikuang ber chu Assam sawrkar hi niin a lang a. Mizoram sawrkar pawhin theihtawp chuan hma a la a, Chief Minister Zoramthanga leh Assam Chief Minister te tunhnaiah an inbiakna ah pawh sawichhuah a niin tun thleng hian harsatna erawh chinfel a la ni lo thung. Kuhva chungchanga sawrkar hmalakna hi kuthnathawktute hian an duhkhawp lo hle a, tun aia nasa zawka kuthnathawktute harsatna chingfel tur hian a penchhuah a ngai tih hre thar se a duhawm hle. 

Share now