Hun engemaw kalta atang khan khawchhak lam atangin kuhva ro a lo lut a, mi tam takin sumdawnna atana hmangin Mizoram khawchhak lamah phei chuan in leh lo tha tak tak nei pawh an awm phah a. Mahse heng kuhva ro te hi chhiah chawi lo leh dan lova lakluh an nih miau avangin sawrkar chuan lakluh a khap a. Mahse heti chung hian vawiin thlengin a ruka lakluh a la ni ta zel niin a lang.

Khawchhak lam atanga kuhva ro lakluhnaah hian milian leh thil tithei tak tak te an inrawlh ngei niin a lang a. Dan leh thupek kengkawhtu Police ten checkgate te siam bawk mahse engemaw zat hi chu a tlang reng a. Kawng pawimawh lai ah te Police te duty thin mahse a helna kawng te an lai chawp mai zel a. Kuhva phurtu lirthei hire na pawh hi a sang a, chuvangin lirthei neitute pawhin an phur mai zel niin an sawi.

Khawchhak kuhva vang hian hun engemaw chen Mizoram kuhva chingtu ten Assam kaltlangin an kuhva thar an hralh thei lo a, hei vang hian hun engemaw chen chu kuthnathawk te pawh an buai anih kha. Tunhnai deuh hun engemaw chen atang khan Assam kaltlangin Mizoram kuhva te chu hralh a ni leh ta a. Hetih laia khawchhak kuhva ro phurh a ni thin hi nakin lawkah kuhva chingtute tan harsatna a siam thei nia hria in kuthnathawktu, a bikin Hachhek biala kuhva ching pawl te chuan khawchhak kuhva ro hi phurchhuak tawh lo turin ngenna pawh tum engemaw zat an lo siam tawh a ni.

Kuhva chingte ngenna hian zawm a hlawh loh avangin tunhnai deuh khan kuhva phurhchhuah tur te chu a kang ta zauh zauh a. Tunhnai leh deuhah kuhva phur nia hriat lirthei a kang chho leh ta zel a, hetiang zela a kal chuan nakin lawkah nunna hlu takin a tuar ngei dawn niin a lang.

Kuhva hmanga sumdawng te hian Police lam pawh an ti lungawi ta mai em ni tih mai turin tunhnaiah checkgate pawh an paltlang niin Kuhva chingtu lam hian an hria a, lirthei pawh a kang ta hial a ni.

Mipui thinrim nia rin ten anmahni thua rorelna an lo lekkawh ve mai hi a fuh lo hle a, tun hnuah chuan thleng tawh lo se a duhawm hle. Chutih rualin dan leh thupek kengkawhtu Police te pawhin mipui rin an hlawh theihnan tan an lak a pawimawh hle a, thil dik lo ti an awm anih chuan an chungah hremna lekkawh ngei ni bawk teh se.