Mizoram chhung, a bikin hmar lam leh khawthlang lamah kuhva ching engemaw zat an awm a. Heng mite kuhva hi hnamdang sumdawng te chuan an leisak thin a, kumtin sum tam tak an lalut thin a ni. Mahse hun engemaw chen atang khan khawchhak lam atangin kuhva a lo lut a, a tlawm zawk avang leh a quality pawh a that zawk vangin Mizoram kuhva te chu hnamdang ten an lei duh ta lova. Chumai ni lovin khawchhak lam atanga kuhva lut dan an tumna lamah Assam sawrkar chuan Mizoram tharchhuah kuhva te thlengin an state paltlang a phal lo bawk a, kan buai hle anih kha. Sawrkar leh mi thahnemngai te hmalakna avangin kuhva pawh dan pangngaiin hralh theih a ni leh ta a, hetih karah khawchhak atanga kuhva lut a awm reng bawk si avangin harsatna kan tawk leh mai ang tih hlauvin kuhva chingtute chuan khawchhak kuhva hi lo lut tawh lo se an duh chungin vawiin thlengin tihtawp theih a la ni lo a ni.

Khawchhak lam kuhva lo lut hi Burma kuhva pawh ni chiah lovin Thailand leh Malaysia vel atanga lokal niin mi thil chikmi te chuan an sawi a. Dan anga lo lut anih miau loh avangin chhiah chawi tur ang an chawi lova, Mizoram chhunga dan kengkawhtu ten chhiah engemaw zat chawitir mahse India state a kuhva tharchhuah te aiin a man a tlawm zawk avang leh a that avangin hralh a kal zawk a. Tualchhung tharchhuah kuhva te chu an hnawng lo thei lo niin an sawi.

Burma kuhva tawlh titawp tur hian sawrkar leh mi thahnemngai te chuan theihtawp an chhuah tawh thin a. Hmun hrang hrangah Police check gate te siamin khawchhak kuhva a lo luh loh nan hma an la thin a. Hmun thenkhatah chuan Police duty te rintawk loh vang nge ni Police duty na bulah khawtlang an duty a, hetiang thil hi hmun dangah chuan a vang viau awm e. Hei hian a entir chu Police te hi mipui ten an ringtawk lo tihna a ni thei ang. Kuhva a sumdawng te hi mi hausa leh thiltithei tak tak an ni a, kuhva sumdawnna ah hian sawrkar milian tak tak an inhnamhnawih bawk si avangin tihtawp a har hle niin a lang.

Hun engemaw lai atang khan mahni thuneihna inpe chawpa dan lo lek ve mai te an awm ta a. Sawrkar mi leh sa pawh ni lovin pawisa lo chawitir mai te, lirthei inahl sak leh kut inthlak thlengin hriat tur a awm ta a, a pawi hle. Mahni thua dan lo siam ve mai hian kan khawtlangah lungrual lohna leh in hmelmakna hial thlen thei a ni a, chuvangin dan leh thupek kengkawhtute hnena kan thlen zel hi khua leh tui tha chuan kan tih tur a ni. Khawchhak kuhva tawlh hi sawrkar pawhin a phal loh a ni a, hetia a lut reng tho nia lang hi a dik lo a, sawrkar hian nasa lehzual a kuhva lut titawp tura hma a lak a ngai hle.