Tunhnaia Mizoram Journalists' Association in Mizoram budget chungchang an zirhona hmanpuitu Chief Minister Zoramthanga chuan Mizoram chuan leiba vaibelchhe 12,000 vel a neih thu te, India rama sate leiba nei tlem ber Sikkim aia vaibelchhe 9 vela a tam thu sawiin state dang leiba ngaihtuah chuan Mizoram chu ba lo ang tluk hial anih thu a sawi a ni.

Leiba chungchangah hian ngaihdan inanglo deuh a awm thin a. Sawrkar kal tawh leh sawrkar kan hrawn mekah pawh chu chu chiang takin a lang a. Sawrkar lai apiangin leiba kan neih tlem thu leh leiba neih chu tihdan pangngai anih thu an sawi a. Sawrkar kaltaah pawh Chief Minister khan 'Bat tam hi changkanna a ni' ti hialin a sawi anih kha! Chutih laiin eptu party apiang chuan Mizoram leiba ngah thu leh an vei thu uar takin an sawi ve zel bawk a, Mizoram hmalam hun thim zia chu an sawi uar hle thin bawk.

Leiba neih chungchangah hian inhnial theih tak a ni a, hmasawnna hnathawh kan tum a, changkanna kawng zawh zel kan tum chuan leiba hi chu kan neih a ngai a ni. Sawrkar kher lo ah pawh company an ni emaw pawl leh mimal ah pawh sumdawnna bultan tur chuan khawi atangin emaw sum an puk a ngai thin a, chumi hmang chuan sum peipungin an lo hausa thin a ni. Chuvangin kan leiba leh sum puk te hi hmasawnna leh hlawkna atan kan hmang em tih hi a pawimawh lai tak chu a ni.

Leiba chungchanga state dang tehkhin fo mai pawh hi a fuh ber lo a, state dang te chuan ram leilung hausakna haichhuah tur an neih tam bakah sum hailuhna tha tak tak an nei tih hriat a tha.

Kan sum puk te mipui leh ramin hlawkna atana a hmang anih chuan leiba neih zel hi a sualna a awm lo. Chutih rual chuan a hmanna hi a pawimawh ber chu a ni zawk. Tun dinhmunah chuan leiba hi kan vei lo lutuk em aw a tih theih a, leiba sawimawi ai chuan leiba nei lo turin sawrkar hian tan la zawk teh se.