DOWNLOAD OUR APP

Read latest news on your phone
app-store

EDITORIAL : Lengpui airport chei that hna thawh chim chhui loh hi !

Apr 03, 2022

Department lam hian mipui lam lungawina tal zawngin hma an lak a that a rinawm a. A nih loh chuan mipui rilrua a cham dan tur hian department rin zawh lohna a hring ang tihte pawh thil awm thei a ni e.

Lengpui Airport chei that thawh meka baggage make up area (BMA) thawh lai chim chu chhui a nih loh chhan PWD hotute chuan an sawi a, chhui a nih  loh nachhan chu Mizoram sawrkar sum hek tur a awm loh vang niin an sawi a ni. 

An sawi zel danin airport chei that chim avang hian nunna chan an awm loh avangin magisterial inquiry neih chu ngai loah an ngai a. Contractor in ama sumin a siamthat hna chu a thawk dawn a, Mizoram sum hek tur a awm loh avang leh contractor chawi belh tur a nih dawn avangin chhui zui ngai loah an ngai a ni. 

Mizoram Airport neih chhun hi chei that a ngai tawh hle a, tun sawrkarin hma a la hi a tha khawp mai a.  Sawkawr pawhin a ngai pawimawh a, kan Chief Minister pawhin a vil tha viau a, a lawm- awm khawp mai.

Baggage make up area saklai mek chim ta hian sawi a ti tam hle a. All Mizoram Cement and Iron Rod Dealer’s Association te chuan helai hmun chim ta hi tlawhin Mizoram sawrkarin lakluh a phal loh BIS standard tling lo iron rod hman an nih thu an sawi tawh a, iron rod te chu a lian tawk lo niin an sawi tawh bawk a. MIMA lam pawhin iron rod zawm dan leh cement chawhpawlh a dik tawk loh vangte  nia an ngaih thu an sawi tawh bawk a, hei hian concrete chakna a ti hniam nia an ngaih thu an sawi bawk.

PWD hotu lam hian iron rod te chu tehfungah tling lo mahse an hman hmain endik niin a chak tawk tura ngaih a nih thu an sawi ve leh thung bawk. 

Lengpui airport chei that hi Project lian tham tak a ni a, zin veih-na atana ‘asset’ pawimawh tak a nih avangin hmun pawimawh tak a ni a. A contractor in iron rod a hman  thenkhat len lam zawngin standard a phak loh thu sawi a nih bakah a thawktu pawh hian an thawh laiin PWD tih dan lo angin eng eng emaw chu an ti niin a lang lehzel a.  Hetiang a nih chuan PWD department atang hian thawm ri va a awm ngei tura ngaih a ni a. Chutiang ni loa mipui ngaiha namnul zawnga thil kal nia lang hi a pawi hle a ni. 

Helai hmun chim hun hi hnathawk te ban rem tan tawh hnu nia ngaih a ni a, nunna chan awm lo mahse a hliam tuar te pawh an awm a. A chim hun chu eng pawh nise project lian thama  hetiang thil a thlen a nih chuan; a thawktu chungchangah  sawi a awm tawh dan te ngaihtuah telin  mipui lam lungawina tal zawngin hma an lak a that a rinawm a. A nih loh chuan mipui rilrua a cham dan tur hian department rin zawh lohna a hring ang tihte pawh thil awm thei a ni e.

Share now