Mizoramin boruaka khawvel dangte kan kalpawhna awm chhun Lengpui airport hma hun zel turah tunlai hian thu inchuh lian tak pahnih a awm a. Sawrkar lam chuan Indian Air Force kuta hlan a duh a, chutih laiin eptu lam leh tlawmngai pawl te chuan sipai kuta hlan chu an duh lo thung.

Airport enkawl hi a hautak a, state sawrkar tan chuan phurrit a tling a ni. Hei hi hria in sawrkar kal tawhte leh tuna sawrkarna chelh mek, ZPM pawhin midang kuta hlan dan an ngaihtuah a. A zir chiangtu tur committee dinin heng mite hmuh dan leh tha bera an hriat chu Indian Air Force kuta hlan hi a ni. IAF kuta airport hlan leh hlan loh chungchangah hian a duhtu leh duh lotu a zirin an sawi thiam hle.

Assembly budget session neih mekah pawh Lengpui airport chungchangah hian private member resolution a lut hial a. Sawihona khaikhawmtu chief minister Lalduhoma chuan IAF kuta airport hlan chu an duhthusam a ni bik lo tih sawiin Finance Commission an lo kal hunah a enkawlna tur sum vaibelchhe 1000 vel lo dil a, an pek theih chuan enkawl chhunzawm chu an duhthusam a ni tih a sawi a. Hei hi a theih loh chuan AAI hi dawr chhunzawm leh a, a rem loh chuan huaisen taka kal a ngai dawn niin a sawi.

Kan hriat angin tun hnai maiah 16th Finance Commission chuan Mizoram an rawn tlawh a. Lengpui airport chungchang hi sawrkar leh tlawmngai pawlte chuan an lo thlen nia hriat a ni a, Finance Commssion hian eng rilru tak pu ang maw? Hetih lai hian Press miten an kawmnaah FC chairman chuan state dangah pawh airport chu IAF nen intawm an awm nia sawiin Mizorama tawm duh lo an awm chu a hriatthiam loh thu a sawi a ni. FC chairman thusawi atang hi chuan kan sum dil tum hi min pe ang em tih ngaihtuah a ti thui khawp mai.

Lengpui airport hi kum 20 chuang harsa takin Mizoramin a lo enkawl tawh a, sawrkar leh mipui pawhin midang kuta hlan hi an duh vek a. Chutih kara Indian Air Force kutah kher hlan tum a ni lai tak hi an hrethiam lovin hlauh an nei a ni. IAF kuta airport hlan a that leh that loh chungchang hi sawrkar hian a puangzar tam tawk lo niin a lang. Engpawh nise chief minister in a tha turah chuan sawrkar chu huaisen takin a kal dawn tih a sawi a, Lengpui airport chungchangah sawrkar hian a ti fuh anih chuan fak a hlawh ang a, a ti fuh lo anih chuan thangthar thlengin dem an hlawh dawn tihna a ni.