August ni 5, 2024 khan Lengpui tumhmun chungchang zirchiang tura sawrkarin a ruat Adviser to CM, TBC Lalvenchhunga kaihhruai Working Committee on Lengpui Airport te chuan an thil zirchianna report bu chu Chief Minister hnenah an hlan a. Lengpui zirchiangtu ten report an hlan tuk atang hian sawi hat a awm chho ta a, hetia sawi a awm tak hat chhan hi Airport zirchiangtute hian Lengpui hi Indian Air Force (IAF) kuta hlan mai an rawt vang a ni.

Lengpui airport IAF kuta hlan an duh loh thu hi Mizoram Pradesh Congress Committee chuan press conference neiin an puang zui nghal a. Tlawmngai pawl hrang hrang Young Mizo Association, Mizoram Hmeichhe Insuihkhawm Pawl, Mizoram Upa Pawl, Mizo Zirlai Pawl leh Mizo Students Union te pawhin thuchhuah intawm siamin Mizoram thil neih hlu Lengpui chu IAF kuta hlan an remti lo tih an sawi a. Tunhnaiah Mizo National Front party pawhin Lengpui chu IAF kuta hlan an remti lo tih an sawi bawk a ni.

Zoram Peoples Movement sawrkar a lo din tirh a, sawrkar lakluh anih khan Chief Minister chuan chanchinbu-mite kawmin Lengpui airport leh Zoram Medical College chu a enkawlna sum a hautak avangin zirchian a nih tur thu a sawi a. Hemi kal zelah hian sawrkar laipui atanga puihna kan dawn vang nge ZMC chu midang kuta hlan tumna a awm ta lem lo niin a lang a. Hetih lai hian Lengpui airport erawh zirchian a niin a zirchiangtute hian midang kuta hlan mai an rawt ta niin a ngaih theih.

Working Committee on Lengpui Airport-ah hian mithiam leh thil thlir zau tak tak an awm a, kawng hrang hrangin ngaihtuahna pawh an seng ngeiin a rinawm. Hetih laia IAF kuta hlan an rawt ta mai nia lang lai tak hi mipui duh loh chu niin a lang a, Airport Authority of India (AAI) emaw midang kuta hlan te rawt ta sela chuan mipui hi an phun a rinawm loh.

Tun dinhmuna mipui hlauhthawn ber nia lang chu Indian Air Force kutah hian Lengpui airport hi hlan ta ila mipui hi ngaih pawimawh berah min nei lo palh ang tih hi niin a lang. IAF kutah hian Lengpui hi hlan ni mahse khualzin phur thlawhna te chu an thlawk chhunzawm zel thei ang a, mahse engemaw rikrum thil indo leh harsatna thleng palh thei lakah IAF hian khualzin phur thlawhna ai chuan anmahni thlawhna chu an ngai pawimawh zawk ngei dawn tih a chiang a. Indo lo thleng palh ta ni se hmelma te chuan Lengpui hi an target hmasa a ni ngei dawn a, mipui tan a him lo hle dawn a ni.

Lengpui hi Mizoram sawrkar ta a ni a, kum 25 emaw vel chu harsa tak karah Mizoram sawrkarin a lo enkawl tawh a, tun thlengin a la enkawl ve tawk tawk a ni. Chuvangin midang kuta hlan anih dawn pawhin IAF ni lo kutah hlan ni ta se mipui hi an lungdam deuh ang. Hlawkna ringawt um lovin mipui service thlir chungin sawrkar hian hma la thei se a duhawm hle.