Hunpui kan lo thleng leh dawn ta a, heng hunah hian lirthei khalhtute leh mipui ke a kalte pawh kan fimkhur tlan a ngai hle. Hunpui a lo thlen dawn hian dan kengkawhtute pawhin theih­tawp chhuahin hma an la thin a, Traffic police te mai bakah Enforcement lam pawhin theihtawp an chhuah thin a, mipui te himna turin theihtawpin hma an la thin bawk.

Hunpui hian boruak danglam hi a nei ve hrim hrim a, Mizoram-ah chauh pawh ni lo ram dangah pawh hian heng hunpuiah hian chetsualna hi a thleng tam bik fo thin a, hei vang hian tu sawrkar pawhin heng hunpui thlen dawn hi chuan chetsualna leh harsatna a thlen lohna turin kawng tinreng hma an la thin. Hetiang boruakah hian mihring rilru pawh a zalen zual thin avangin kan fimkhur zual a ngai thin.

Eizawnna leh zirna avang te damlohna avang te leh chhan hrang hrang avangin khawpui-ah leh thingtlang lamah te kan awm a ngai thin a, Mizoram-ah pawh Christmas leh Kumthar a lo thlen dawn hi chuan mahni khaw lamah, kan chhungte bula hun hmang turin kan haw khawm ta thin a, chim leh hmar chhak leh thlang panin kan haw ta sung sung thin a, lirthei hmangin kan khaw lam chu kan pan ta thin a, heng hunah hian Lirthei khalhtute an pawimawh a, an mi phurhte himna tur ngaihtuahin mahni thunun theih tawka lirthei khalh a tul hle.

Khawpui chhungah pawh hunpui a lo thlen dawn hi chuan mi tam takin chak la turin khawpui an pan khawm thin a, khawpui pawh tum dang zawng aiin a tawt lo thei lo, hei vang hian mipuite pawh lirthei laka kan fihlim a tul a, mahni himna tur ngaihtuahin fimkhur taka kan khawsak a ngai a, chutiang bawkin lirthei khalhtute pawh mipui tam taka kara kan lirthei te tha taka thunun a tul tak zet a ni. Kan lirtheite pawh tehna hrang hranga tling, khalh tura him tawk a ni ngei tur a ni bawk. Lirthei khalhtu kan ni emaw, ke a kal kan ni emaw, hunpui nuam tak leh hlim taka hmang turin kan him a ngai a, mi hlim laia lungngai taka hun kan hman lohna turin kan fimkhur tlang hi a tul khawp mai.

Tin, Bazar kan kalnaah te pawh rukru lakah leh mi bum ching lakah pawh kan fimkhur a ngai hle a, hetiang hunah hian thil tihbo a tam thin a, harsa taka kan thawhchhuah te mi dang lakah kan hloh lohna turin hemi kawngah pawh hian kan fimkhur a tul hle a ni.