Kan hriat angin kan thenawm state Manipur ah chuan Meitei leh tlang mi te inkarah buaina chhuakin in leh lo tam tak hal anih bakah mihring thi pawh engemaw zat an awm tawh a. Buaina hi thelhmih tumin sawrkar laipui pawh a inrawlh ta hial a, he buaina hian eng chen nge a awh dawn hriat a har hle.

Manipur buaina chhuah chhan ber hi ram inchuh niin a lang a. Manipur ah hian Meitei hi hnam tam ber an ni a, tlangmi kan tih mai Zohnahthlak leh Naga belhkhawm ai pawhin an tam zawk a ni. Hetia hnam tam zawk an ni chung hian an state a hmun tlem te, pahi zawl lai 10% vel emaw chauh hi an luah a. Tlang rama awm turin scheduled tribe an nih bawk si loh avangin an awm thei lo a. Hei tak hi hnam awm tam zawk Meitei te hian an ngaimawh em em mai a. Chuvangin tlang rama in leh lo an din ve theihna turin scheduled tribe a Meitei chu dah ve a, tlang mi te rama awm ve hi an tum a ni. Chu an thiltum chu tlangrama awm te chuan duh lovin tunah hian an buaina inup chu a alh chhuak ta a ni ber mai.

He buaina hi a ril a, eng chen nge a awh ang a, engtin nge chinfel a nih dawn tih pawh hriatthiam har tak a ni ta a. Khawi lam ve ve pawh an tanna ah hian an tang khawng tlat anih chuan thisen hi a la chhuak zel dawn ni te pawhin a lang.

Hetia kan Zohnathlak ten buaina an tawh takah chuan an sahimna hmun leh an inpui Mizoram chu mi tam takin an rawn pan mek niin a lang a, heng mite lo tuamhlawm zel hi kan mawhphurhna a ni tih kan hriat thar a tha awm e. Kan sawrkar pawhin Zohnahthlak te himna atan nasa takin hma a la hi a lawmawm a, hma a lak zel pawh mipui hian an beisei a ni.

Tunhnaia Burma buaina avangin mi engemaw zat Mizoramah an rawn lut a. Bangladesh buai avangin an rawn lut bawk a, tunah Manipur buaina avangin an rawn lut tan leh mek bawk. Heng kan unau te hian min thlamuanpui a, an inpui ah an rawn lut a ni tih hria in duat takin lo mikhual zel ila a duhawm hle.