Chief Minister Lalduhoma chuan Mizoramin deh chhuah a neih a, hnathawh tur a pun theih nan thiamthil nei thalaite chawisan tum a nih thu a sawi rual hian entrepreneur te bana kaia din chhuahtirna atan ZPM Handholding scheme chuan remchang a siam sak mek thu a sawi. Bul lo tan tawhte pawhin a aia sang zawk an thlen theihna tur tan an lak a ngaih thu a sawi a.

He thu hi Confederation of Indian Industry Centre for Excellence and Employment & Livelihood leh Micro & Small Entrepreneurs Excellence Project in  Mizoram leh Mizoram Entrepreneurs Development Forum a hawnnaah a sawi a ni.

India rama ziak leh chhiar tam berna state kan nih rual hian thiamthil (skill) ah erawh Mizoram hian filawrna a nei lem lo hle a. Kan thalaite pawh ti thei deuh zul an ni mai hian a hriat a, pawl 12 hma atang hian kal bikna neia tah hriam kan ngai nasa tawh tih a lang reng a.

Thiamthil nei leh entrepreneur te chawi san kan tum han tih ngawt hi a sawitu CM hian chona lian tak amah a inpe tih a inhriat beisei ila. Sawrkar hian mi 50,000 tling lo a chhawr a, a enkawl nan kan budget 70% a sen a ngai thung a. Private sector kan tih hi Mizoramah chuan MSME an ni deuh fur a, inziaklut organised sector atang hian mi 60,000 chuang hna an pe nia chhut a ni a, sum vir erawh vaibelchhe tlemte chauh a ni. Sumdawnna khawih /entrepreneur inziaklut fumfe lo hi za tam tak an la awm anga, mi chhawr thahnem tak an chhawr bawk ang.

Ram dang angin corporate leh industry lian tak tak nei lo mah ila te reuh te te kan neih ho hian mi chhawr an nei fir fer tihna a ni zawk a, belhkhawmin an tam phian tihna a ni.

Central lam chuan hnathawk te chanvo siamthat nan Labour Code a rawn ti chang tlung a, Mizoramah pawh hman ve theihna a awm nual ang a, hmang thei reng la hmang lote pawh hmang tura tihte pawh an ngai ang. Sumdawnna khawih leh Entrepreneur te khaikan an nih rual hian an mi chhawrte thiamthil tha tak nei dinhmun a tha pangngai em tih enfiah a pawimawh tawh hle a. Mi chhawrte dinhmun ngialnghet zawka danin a phut anga dah thei, dah lem lo tam tak an awmin a rinawm a. Hemi ringawt enfiah pawh sawrkar tan chuan chona lian tak a ni bawk ang a, hmabak a la ko viau bawk ang.