Mizoram MLA inthlanpui a hnai ta hle a, political party hrang hrang ten theihtawp an chhuah chho mek a.   MPF leh political party ten thawhhona thuthlung an siam 5-na ah chuan 'A tak ram thleng thei tur leh tihhlawhtlin theih tur chauh manifesto, policy leh programme duan ni se' tih a ni a, hei tak hi political party tin leh candidate te hian an ngaih pawimawh a tul hle.

Candidate tam tak chuan tlin an duh luatah tih hlawhtlin theih loh tura ngaih pawh tiam zung zung an ching a, an duh anga hmalak anih leh si loh thin avangin mipui ah beidawnna nasa tak a thlen phah thei a ni. Zep nak emaw tuna rorelna chelh mek MNF party vawchhetu langsar tak leh eptu ten an beihna nasa ber chu an hotupa thusawi hi a ni. SEDP hmanga cheng nuai 3 dawn/sem te, kawng chhawng, traffic jam awmlohna khawpui, leiverh tih leh thil dang dang te hi an khingpui ten beihna hmanrua atan an hmang tangkai a. Fimkhur a tul hle.

Tun hnaiah ZPM hruaitu chuan sawrkarna an chang anih chuan kum 5 chhung eng chhit man an tihsan loh tur thu a sawi a. Heng a thusawi te hi a ngaihtuah chiang em? Mizoramin power leina atana kan sum sen nasat zia te, sawrkarin a hmuh let a tlem vanga sawrkar sum kalral nasat zia te hi a rapthlak zawk a ni. Power & Electricity department chuan kumtin a hma aia nasa zawka eng chhit man hi tihsan a rawt ziah a, mahse an rawtna ang em em a tisang lovin JERC chuan mipui tana phurrit lutuk lo turin a man hi a bithliah thin zawk a ni. Kum 5 chhung hi power hman man tisang ta lo ila state pachhia Mizoram hian kan tuar viau in a rinawm.

Congress hruaitu in Bairabi hydel project khuah tum anih tur thu a sawi te pawh hi tih hlawhtlin theih a ni dawn em tih chik taka ngaihtuah phawt a tha hle mai. Bairabi hi khuah dawn ta ila zangnadawmna leh a khuahna senso ah hian cheng eng zat nge sen ngai ang, kan sum hman zawng zawng atanga chhutin power a siamchhuah chu eng zatin nge mipui ten an lei theih ang tih te chhut hmasak a ni em?

Kan hma lawka inthlanpui loawm turah hian tlin tum luatah thil tih theih loh tur tiam hi nakin lawka party leh candidate te min vaw lettu a ni tih hre thar leh ila. Tih hlawhtlin theih loh tur leh ram leh hnamin a tawrh theih tur ang chi hi chu party leh candidate te hian tiam lo hram teh se.