Mizote hian kan pi leh pu atangin kut chi hrang hrang kan nei a, Mizo kut zingah chuan Chapchar kut, Mim kut leh Pawl kut te hi a langsar te an ni a. Heng kut zingah hian a ropui ber Chapchar kut hi vawiin thlengin ropui takin kan la lawm chhunzawm zel a, kut dangte erawh hi chuan ngaih pawimawh an hlawh lovin hman chhunzawm pawh an ni ta lo.

Tunhnaiah Mizoram sawrkarin kut engemaw zat hman/lawm thar a nei a. Anthurium festival, Thal favang kut, winter festival tih leh engemaw neuh neuh a awm a. Chung zingah chuan vawiin thlengin Anthurium festival hian ngaih pawimawh a hlawhin kan hman uar ber pawh a ni ta zel a ni.

Anthurium festival hi Covid hripui avanga kum 2 chhung a hman dan pangngai a hman theih a nih loh hnuah Zirtawpni leh nimin khan Reiek Tourist Resort-ah mipui chhim theih turin hman tan leh a ni ta a. Anthurium Festival-ah hian Mizo hnamzia phochhuahna hnam lam, zaithiam/band leh fashion show te bakah intihlimna chi hrang hrang bakah Mizo Handloom & Handicrafts exhibition, Mizo eisiam chi hrang hrang, Zokhua (Mizo Typical Village) Adventure activities - ziplining, climbing, Tent accomodation, Forest Bathing, Star Gazing, Anthurium Varietal Display & Sale leh intihlimna dangte hmanga hman a ni.

Anthurium kan hmang leh thei hi thil lawmawm tak anih rualin tun aia kokim zawk leh mipui tam zawk telna tur siam theih nise a duhawm hle. Tun dinhmunah chuan mi hausa leh mi tlemte te chauhin an chhawr tangkai em ni aw tih mai a awl rum rum a. Sawrkar laipuiin he kut (festival) hman a duh leh tum chhan ber khualzin mite hipluhna tur hi kan thelh deuh niin a lang. 

Hmarchhak state hnam hrang hrangte hian kut chi hrang hrang an nei a. Nagaland ah te chuan Hornbill festival chu an larpui hle a, khualzin mite pawh a hipin kut hmang hian khualzin mi engemaw zat an fuankhawm thin a ni. Anthurium festival pawh Reiek ah hman a ni thin a, a nawm rual rualin kan hmunhma hian mipui punkhawmna min dawl zo lo hle tih a lang a. Chuvangin sawrkar hian mipuite tana pan awlsam tur hmun, traffic buai lo tur Kut neihna tur hmun nghet hi a ngaihtuah a pawimawh hle.

Anthurium festival lo pawh kut dang hi nei zel thei ila a duhawm hle a. Chutih rualin tun ai hian engtin nge khualzin mite hi tam zawk kan hip luh ang tih te beng sika ngaihtuah a tha hle mai. Tuna kan hman dan tlanglawn ber zai leh lam ringawt hi chu mipuite hian kan ning tawh niin a lang a, hei aia khualzin leh mipui hip zawka kut hman dan ngaihtuah a pawimawh hle.