Zirtawpni kalta khan Mizoram State Boundary Committee chu an Chairman Dy. Chief Minister Tawnluia hovin Directorate of Forensic Science Laboratory Conference Hall-ah a vawi 4-na atan an thukhawm leh a. Meeting-ah hian Assam sawrkar hnena thlen tur Mizoram sawrkarin ramri chin atana a hauh (inner line of 1875) an sawiho bakah kumin October thla chawhnu lama Guwahati, Assam-a Mizoram sawrkar leh Assam sawrkar aiawhte inbiak huna an thu ken turte leh thil pawimawh dang te an sawiho a. Hei bakah hian Mizoram-Assam ramri chinfelna tura State Boundary Committee in an buatsaih “Approach Paper” chu October thlaa State pahnih aiawhte inbiak hunah Mizoram aiawh ten tan chhan atan hmang se an ti a, State pahnih ten ram an hauh chin ve ve a hmuna endik turin Joint Verification neih ni se an ti bawk a ni.

Mizoram hian international leh state dangah te chuan lui luang te a awm avangin ramria buaina hi kan nei lemlo a. Bangladesh leh Burma lamah chuan luipui in min then a, chutiang zelin Tripura leh Manipur lamah pawh harsatna liantham kan nei lo a. Assam nen erawh chuan khuavang ramri then kan neih loh avang leh kan hauh chin a inan loh avangin UT kan nih tirh atanga vawiin thlengin kan la buai chhunzawm zel a ni. 

Assam nena kan ramri chungchangah hian keini chuan Inner Line Reserve 1875 hi kan pawm leh kan hauh chin chu a ni a. Mahse mipui rilru ah hian kan ramri a kan hauh chin leh kan pawm chin erawh a dang hret niin a lang. Tuna Inner Line Reserve kan rama kan hauh tak hi chu nei vek dawn ta ila kan duh kher ang em tih hi zawhna awm thei a ni. Hei hi nei vek dawn ta ila chuan Non Mizo mi nuai tel hian kan state ah vote an nei dawn tihna a ni a, hei hi thil tha ber pawh a ni kher lo mai thei a ni.

Engpawhnise Mizoram State Boundary Committee hian a hmun ngeiah kalin ramri hi enfiah an tum a, chutah chuan kan kan tanhmun tur dik tak tur leh kan pawm thei chin chu a hriat theih a rinawm. Ramri chinfel hi thil buaithlak tak a nihna chen a awm a, sawrkar laipui kaihhruaina hnuaia state pahnih te sawifel tur anih miau avangin kan duhdan ringawt hi a tlang thei lo ang a. State pahnih te hian tawlh chin an neih ve ve pawh a ngai ngeiin a rinawm.

Hetia hnam anga tanrual hun lai taka PC Party leh Mizoram Pradesh Congress Committee te an inhnukdawk erawh a pawi hle a. Committee atanga an inhnuhdawh chhan te uluk taka zir chunga sawrkar hian an tel leh ngeina tura hma a lak a pawimawh hle. Mizoram leh Assam ramri chungchangah hian sawrkar hmalakna hi mipui ten an thlir reng a, huaisen taka hma a lak zel hi an beisei a ni.