Kan hriat angin Mizoram state chu leilung hausakna haichhuak lo, industry leh factory lian pawh awm ve lohna hmun a ni a. Hei vang hian thawhchhuah kan nei lo a, kan in nghahna chu sawrkar laipui a ni. Hei vang hian hun kal tawha kan politician thenkhatte au hla pawh 'central fa chuam' tih te, 'central-a tlatlum thei' tih te a ni. Sum thawhchhuah tih tham kan neih miau loh avangin sawrkar laipui tanpuina hi loh theih lohin kan dil a ngai thin a ni.

Kuminah pawh state sawrkar sum dinhmun a that tawk loh avangin loh theih lohin kan lo puk a ngai leh a, tum emaw zat OMB hmangin puk a ni tawh a. Kan puk leh zel pawh a la ngai ngeiin a rinawm. Sawi tawh angin Mizoram chu state dangte aiin kan harsa bik a, state dangte mamawh ang kan mamawh ve tho si avangin sum hi kan puk lo thei lo a ni. Sum puk leh leiba chungchangah hian eptu leh sawrkar dinglai ngaihdan a inang thin lo a. Sawrkar dinglai apiang hian leiba hi an sawimawi a, eptu apiang hian a hlauhawm thu hi an sawi ni hian a lang thin. Tuna sawrkarna fawng chelhte ngei pawh hian eptu lama an awm lai chuan sum puk leh leiba chungchang hi an aupui nasa thin hle anih kha.

Tunhnaia Zoram Research Foundation (ZRF) leh Aijal Club tangkawpten Symposium on State Finance: Issues and challenges an buatsaih a hmanpuinaah Chief Minister Lalduhoma chuan sum leh pai hmuh chhun chhun te fel fai leh daihzai taka hman an tum tih te, sawrkar chu overdraft leh an tum tawh lo tih a sawi a. Tun hnaia Special Drawing Facility a sum puk zauh zauh pawh awmze nei, sawrkarin a hlawkpui zawk vanga ti an ni tih a sawi a. Chief Minister thusawi hi thil lawmawm tak a ni.

Tuna sawrkarna siam mek ZPM ah hian mipui ten beisei an nei sang a, mithiam tak tak an awm mai bakah tuna Chief Minister pawh eptu ah hun rei tak lo awm tawh, tawnhriat nei tha tak anih vang a ni. Sum harsatna chungchang leh leiba chungchang pawh chiang taka hre turah mipui ten an ngai a ni. Chief Minister sawi anga sum puk hi awmze nei leh hlawkpui tur zawk anih chuan a lawmawm a, puk kawngah pawh inthlahrung lova sawrkar a kal zel pawh a that a rinawm. Sawrkar a ni emaw company a ni emaw pawl leh mimal pawhin bul an tan dawn chuan a bultanna tur sum an puk a tul chang a awm thin, sum chu a nihna tur taka hman anih chuan an hlawkpui thin a ni. Chutiang chiah chuan sawrkar pawh hian sum a puk niin mipui ten an ngai a. Sum puk chungchanga Chief Minister thusawi hi mipui ten chhinchhiahin sawrkar sum hmanna hi an enzui reng dawn a ni.