Inthlang ram kan ni a, kan aiawha roreltu turten inthlan dawnah an tih tur leh mipui vote huina atan inzawrhna an nei thin a. Tuna Mizorama sawrkarna chelh mektu Zoram Peoples Movement party pawhin sawrkarna an chan chuan an tih hlawhtlin tur thil an sawi zingah tunlaia sawi hlawh tak Mizoram Universal Health Care Scheme hi a tel a. MUHCS hi April,2025 atanga hman tan a niin he scheme hman anih hma hauh atangin harsatna a tawk a, sawrkar hnathawk inzawmkhawm pawl chuan huam tir ve lo turin an ngen a, private damdawi in neitu intelkhawmte pawhin an duh lo bawk.

Health care scheme thar hi pawisa fai pek ngai lova damdawi lama inenkawl theihna tura ruahman a nih avangin Non-Government Hospital Association of Mizoram chuan an duh lo a, an zawm theih loh thu an lo puang tawh a. Health department-a Commisioner hriattirna tih chhuahah chuan health care scheme zawm tawh Deemed Empaneled chu Mizoram chhungah private 6 leh state pawn hospital 20 an awm tawh tih tarlan a ni a. Mizoram chhunga deemed empaneled private hospital te chu Maraland Gospel Centenary Hospital, Siaha; JC Eye Hospital, Bungkawn; Nazareth Hospital, Chaltlang; Christian Hospital Serkawn, Lunglei; Christian Hospital Lawngtlai leh MED-AIM Adventist Hospital, Champhai te an ni a, state pawna health care scheme thar zawm tu private hospital 20 zingah hian Mizo ten an pan thin damdawi in te pawh a tel a ni.

MUHCS policy 2025-26 hi April ni 1, 2025 atanga March ni 31, 2026 thleng hman tur a ni a, he scheme hnuaia inziak lut turte tan hian May 2025 thleng hun hawn a ni a, hemi hun chhunga inziaklut hman lote tan pawh July 2025 chhung inziahluhna hun hawn a ni leh dawn a. Health care thar hnuaiah hian damdawi ina inenkawlna chu package anga kalpui a ni dawn a, mahni insenso ngai lovin damdawi in luh ni atanga chhuah ni thleng, pawisa pek ngai lo hmangin damlo te chu an inenkawl thei dawn a, an inenkawlna senso chu sawrkar in a pek sak dawn a ni. MUHCS hman atan anih dawn avang hian sawrkar pawh nasa takin a inbuatsaih a, khawl chi hrang hrang pawh lei thar a niin thawktu pawh lakbelh zel tum a ni a, hei mai bakah khum pawh engemaw zat dah belh a ni bawk.

Mizoram chhung damdawi in zinga MUHCS pawmtute hi a tlangpuiin Aizawl khaw pawn damdawi in te an ni a, Aizawl leh thingtlang atang pawha damlo ten an pan tam ber private hospital te an tel lo erawh a pawi hle a. Non-Government Hospital Association of Mizoram hian MUHCS hnuaiah hian sum tam tak an hloh dawn nia an ngaih vanga pawm lo niin an lang. MUHCS hi private damdawi in ten an pawm loh chuan sawrkar damdawi in ringawt tan chuan damlo enkawl ngaihna a awm dawn lo chiang a, NGHAM leh sawrkar in an pawm theih tur inremna siam thuai anih loh chuan a tuartu tur chu damlo retheite an ni dawn avangin harsatna awm hi chinfel thuai nise a duhawm hle.