Mizorama sawrkar hnathawk inzawmkhawm pawl Federation of Mizoram Government Employees & Workers (FMGE&W) chuan a hun taka hlawh lak leh sawrkar laipuia thawk te lak ang dearness allowance (DA) lak phutin nawrh an rel a. An hmalakna hmasa atan hnathawk lova pisa kai an rel a. A hun tur tak erawh an hotu Office Bearers te kutah an dah a ni.

Sawrkar hnathawk te thilphut khi an thlirna atanga chuan tih awm tak niin a lang a. A hun taka hlawh lak loh hian nghawng nasa tak a nei a. DA chungchangah pawh bazarna hmun in ang theuh theuh DA in ang lo zung pawh hi a dik lo khawp mai. Chutih rual erawh chuan sawrkar hi sum leh pai ah a harsa em em a, a hnathawk te hlawh hi a pe thei ngawr ngawr chauh niin a lang a. Sum harsatna hrechiangtu ber ber ten hetia thilphut an han nei hi a hun lo ti pawl pawh an awm ngei a rinawm.

Engpawhnise kumin kum tawp lamah MLA inthlanpui a awm dawn a. Pawl hrang hrang ten thilphut chi hrang hrang an neih kum a ni a, lungawi loh kum te pawh a tih theih hial awm e. Sawrkarna chelhtu lam chuan chinfel kha an hna pawimawh tur a ni leh ngei dawn a, engtin nge a hmachhawn zel ang chu hunin a la hril zel turah ngai ang.

Hun kal tawh ah pawh khan inthlan dawn kumah chuan thil phut beisei nei hi an pung hluai zel a, hetia demand nei an pun chhan hi inthlan dawna sawrkar nek a nawm thin vang a ni awm e. 

Kumin pawh hi inthlan kum anih avangin pawl leh mi hrang hrangin sawrkarah thil phut an rawn nei leh ngei dawn a. Sawrkar hian mipui vote duh vangin zirchianna leh nghawng tur pawh ngaihtuah lovin a tiam leh mai ang tih a hlauhawm hle. Heng demand hrang hrang neitute thil phut hi tih hlawhtlin chi a nih leh nih loh ngun taka zirchian a, ram tana tha ber tura ngaihtuahna seng chunga thutlukna siam ni thei se a duhawm hle.