Tunhma deuh atang tawh khan Mizoram politics ah dawt nge thu tak tih pawh mipui ten kan hriat hleihtheih loh khawpin inpuhna chi hrang hrang a thleng tawh thin a. Heng inpuhna chi hrang hrang hi vawiin thlengin a la awm ta zel a. A then chu eirua inpuhna te, tute emaw chhungkhat leh laina hnai zual duhsak bikna te leh a dang dang te an ni. Tunhnaiah pawh Congress President chu nuai 25 laa puhna a awm a, hei hi thudik nge dawt tih hriat a har hle.

Tunhnaia Congress atanga bang ta Minister hlui pakhat chuan Mizoram Pradesh Congress Committee President hna chelh mek tu chu Congress sawrkar laia nuai 25 la ah a puh a, mahse a puh hian a lak loh thu sawiin MPCC thuchhuah chuan hemi chungchangah hian intihhmingchhiat thubuai (defamation case) pawh an thehluh theih mai thu an sawi a ni.

Hetiang hi thil awmdan anih tak avang hian tuna MPCC President hian Minister hlui puhna ang hian nuai 25 hi a la em ni tih zawhna mipui rilru ah a awm a. Chutih laiin MPCC President hian la lo angin a insawi bawk si nen mipui chuan eng nge thudik tih kan hre ta lo a, kan awkai a ni ta ber a ni.

Minister hlui hian MPCC President hi khatih laia a in, Luangmual atanga nuai 25 hi la ngei niin a banna lehkha ah hian chiang takin a sawi a. MPCC President hian chhanna emaw sawifiahna chiang tak a tarlang thei a nih loh chuan mipui lam chuan thiam lo zawkah an puh ngei ang.

MPCC President hi eirukna laka mi fihlim nia an hriat vanga Congress party pawhin Party President atana an vawrhchhuah, Chief Ministerial candidate ni phak a ni a. He inpuhna ah hian mipui rin a hlawh theih nan fiahfai taka a sawifiah emaw a tul chuan Court thleng pawha intihhmingchhiat thubuai hi a thehluh a ngai tih a lang a. Kan hma lawkah Mizoramin MLA inthlanpui kan hmachhawn dawn a, campaign vawrtawp a thlen hunah chuan he thil hi sawichhuah anih dawn tho tho avangin a nihna dik tak sawifiah mai hi a that zawk a rinawm. Tun dinhmunah chuan mipui ten MPCC President hmalakna hi an ngaichang thup niin a lang. He inpuhna ah hian mipui ten thudik hriat hi an chanvo a ni a, thu diklo sawi an awm anih chuan chu chuan a sawitu chuan an tawrh ve ngei pawh a that a rinawm e.