DOWNLOAD OUR APP

Read latest news on your phone
app-store
EDITORIAL : Pension kum tihsan
Feb 19, 2023

Mizoram sawrkar hnathawk inzawmkhawm pawl Federation of Mizoram Government Employees & Workers chuan February ni 10,2023 khan Chief Minister hnenah lehkha thehlutin a hun taka hlawh lak an duh thu te, Dearness Allowance pawh sawrkar laipuia thawk te rate ang zel hman an duh thu leh pension hun pawh kum 60 atanga 62 a tisang tura an ngenna ten awmzi a awm lo nia an hriat vanga lungawi loh lantir an tum thu te an thlen a.

Federation of Mizoram Government Employees & Workers thu thlen zingah hian pension kum tihsan chungchang hian sawi zui a hlawh ta deuh a. Zirlai pawl pahnih Mizo Zirlai Pawl (MSU) leh Mizo Students Union (MSU) te chuan an thlawp loh thu thuchhuah siamin an tarlang nghal a ni.

Fifth Central Pay Commission chuan kum 1998 khan sawrkar laipuiiah rawtna (recommendation) thlenin sawrkar hnathawk te pension kum chu 58 atangin kum 60 ah tihsan a rawt a, he an rawtna hi sawrkar laipui pawhin pawmin tihsan a ni a. Tun dinhmunah department thenkhatah chuan pension hi tihsan leh te a ni a, mahse a tam ber chuan kum 60 hi an la hmang a ni.

Khawvel changkang zelah thiamna a sang telh telh a, mihring pawh kan hriselin kan damrei sawt sawt niin a lang. Mi tam takah chuan kum 60 hi la valai tak an ni a, han pension mai atana uiawm tak tak pawh an awm a ni.

Chutih rual erawh chuan kum 60 kan tlin meuh hi chuan kan mawng hi a rit tlangpui tawh a, hna han thawk zung zung tur hi chuan kan tlin tawh meuh lo niin a lang. Tuna pension kum 60 hi 62 ah tihsan ni ta se mi tam tak promotion hi a khawih buai ngei dawn tih a lang a, kaisan nghakhlel tak tak tan chuan a ngeiawm khawp ang.

Hei mai bakah thalai lehkhathiam leh fel tak tak kum tinin a sang tel an chhuak a, pension kum hi tihsan anih chuan heng mite hian hnathawh tur an nei mai dawn lo tihna a ni. Mithiam engemaw zat an thiamna chhawr loha a awm tur hi thil uiawm tak a ni a, chuvangin tun dinhmunah chuan pension kum hmanlai hi hman chhunzawm zel nise a fuh berin a rinawm e. 

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh