Chief Secretary Dr. Renu Sharma chuan October 11, 2024 khan office memorandum ti chhuakin sawrkar pisa kai hun chhunga awm tluan lote lakah disciplinary action lak a nih tur thu a sawi a. Chief Secretary chuan sawrkar pisa kai hun chhunga awm tluan turin sawrkar hnathawkte beisei an ni tih tarlang­in pisa chungchangah hian vawi eng emaw zat thuchhuah siam a ni tawh chung pawhin officer leh staff thenkhat zingah pisa kai hun chhunga pisaa awm tluan lo an awm nia sawiin pisa bàn hun hmaa pisa chhuahsan lo turin sawrkar hnathawk zawng zawng a hriattir a ni.

Pisa kai hun chhung hi sawrkar ruat a ni a, Mizoramah chuan thlasik laiin zing dar 9:00 atanga tlai dar 4 leh nipuiah zing dar 9 atanga tlai dar 5 te a ni thin a ni. Heti anih chuan thlasik laiin ni khatah sawrkar hnathawkte hian hnathawh hun chhung darkar 7 leh nipuiah ni khatah hnathawhna hun darkar 8 an nei tihna a ni. Hetiang hian taima takin an thawh hun chhung hian thawk ta sela chuan hmasawnpuina tham a tling ang.

Mahse pisa tan hun zing dar 9 ah hian office hrang hrang han kal ila, hmuh tur hi an vang pharh mai a ni. Office hrang hrangah hian a tlangpuiin zing dar 10 hma chu an dawr theih meuh loh a ni. Zep nak emaw pisa hnathawk thenkhatte phei chu office an thlen hian thingpui hang in leh thildang tih hmasak phawt chingte an awm a, tlai lamah lah nise pisa ban hun awm thleng zak zak peih hi an tam tawk lo hle a ni. Chuvangin hetia Chief Secretary in thuchhuah a nei hi a tul hle tih a lantir a, kan inthlahdah zia pawh chiang takin a lang a ni.

Pisa kai hun vawng dik lo mai bakah pisa kai hun chhunga sawrkar hnathawk ten chhuahvahna tur an ngah lutuk pawh hi a fuh lo hle. Pisa hun chhungin inneih­naa kal, lungphun, thihna leh thildang chhuanlama sawrkar hnathawkte an chhuak tam lutuk pawh hi thil dik lo, eirukna chi khat tho a ni. Hetianga an chhuak dawn anih chuan casual leave emaw la in midang tana harsatna siam lo zawnga awm theih a tha hle. Hetia sawrkar hnathawkte thil danga an chhuah bo hian a ruaitu sawrkarin sum nasa tak a hloh bakah mipui tan harsatna an thlen a ni. Chuvang­in hemi kawngah pawh hin khauh zawka sawrkarin hma a lak a ngai hle.

Tun hma deuh khan office chungchangah hian a hun takah an kal em, an chhuak bo em tih leh thildangahte endik (surprise visit) neih a lo ni tawh thin a, kha khan hun engemaw chen chu a tha zawngin hmasawnna a thlen a ni. Tuna pisa hun chungchanga Chief Secretary thuchhuah pawh hi head of department ten khauh taka an kenkawh ngei a pawimawh a, hmahruaitu leh entawn tura an awm hmasak a ngai dawn a ni.