Hman khat daih sarang an tih mai 'single use plastic'hi khawvelin a buaipui ta hle mai a. A tira an siamchhuah lai chuan thil tangkai tak, hman awlsam leh tlawm bawk si anih avangin thil hmuhchhuah tangkai tak ni tura ngaih a ni a, mahse a thatlohna lam hriatchhuah anih tak zelah hian khawvel pawhin a buaipui ta hle a. Ram engemaw zat chuan plastic hi an khap chho ta reng a ni.

India ramah pawh National Pollution Control Day denchhen in Mizoramah pawh Single Use Plastic Free Day hman a ni a, he ni hmanna ah hian kalkhawm ten thu tiam la in, plastic aiawh (alternative) siamtu ten an thilsiam te an phochhuak bawk a ni. Mizoramah ngei pawh office tam tak chuan hman khat daih plastic hi an office a hman an remti tawh lo a, rah tha a chhuah chho zel dawn ni pawhin a lang.

Hman khat daih plastic 'polythene' kan tih mai te hi hman an awlsamin a man a tlawm a, hmun a heh loh bakah a zangkhai em avang hian mitin mai hian an hmang nasa hle a. Sawrkar laipuiin hman khap mahse bazar leh sumdawnna hmunah te chuan ip khai leklam ber a la ni ze; hrih a. Hetia hman lar a la nih chhan hi mipui ten a hlauhawmzia an la hriat tawk loh vang ni berin a lang.

Aizawl Municipal Corporation chuan kum 2/1 kalta vel khan Aizawl khawpui ah hman khat daih plastic a khap a, Aizawl bazar leh dawr thenkhatah te kalin hetiang kawl te chu an man sak anih kha. Khatia AMC in chak taka hma an lak lai kha chuan polythene pawh a vang duak mai a. Mahse AMC khapna khan bawhzui a hlawh tawk lo deuh a, a tira vang duak kha tunah chuan hmun tinah hmuh tur a awm leh ta a ni.

Plastic in kan chenna leilung leh boruak a tih chhiat em avang hian mithiamte chuan khap/ hman loh hi a tha ber tih an hria a. Mahse a hmangtu mipui ten a hlauhawmzia an la hriat tawk loh avangin he khapna hian zawm a hlawh tawk lo ni berin a lang a. Tun dinhmuna kan mamawh ber chu mipui hnena plastic hlauhawmzia inzirtir hi a ni.

Sawrkar hian tun ai hian plastic khapna hi nasa lehzualin kalpui thei se. Plastic hi khap anih chuan a aiawh tur, kan ram leilung leh boruak pawhin a ngeih tur éco friendly'a rawn chhuak thuai dawn a. Hman nawn theih chi hi mipui ten an hman chuan kan boruak in a ngeih dawn bakah eizawnna tam tak a siam dawn a ni.