Mizoram Police lal ber Director General of Police Anil Shukla chuan tunhnai khan khawchhak lama Mizoram police te tlawhin an hmalak dan te a enfiah a. Khawzawl police te a tlawha thu a sawinaah Police kum 60 an tlin hma a thi an tam chu a ngaimawh thu a sawi a ni. DGP hian Mizoram Police zingah kum 60 an tlin hma a kum khat chhungin mi 150 vel zet thi an awm thin niin a sawi a. DGP in police thi tam a vei hi a awm hle a, hei hian ngaihtuah a ti thui hle.

Police te hi dan leh thupek kengkawhtu pawimawh tak an ni a, an hriselna pawh an uluk a ngai a. A chang chuan hah tak tak leh zan rei pawh sawi lova hna an thawh a ngaih chang a awm a. Police an chak chuan misual an tawmim a, mipui an thlamuang thin a ni. Mah se hetih lai hian DGP sawi anga kum khatah mi 150 vel zet an thi anih chuan an hrisel lo hle emaw an taksa ngeih loh thil engemaw an lalut tihna a ni dawn a, thil pawi tak a ni.

Kan hriat angin Mizoram sawrkar chu sum leh pai lamah a pachhe hle a. Police department tiamin hna thar lak pawh a har hle a, police ah ngei ngei pawh hnaruak engemaw zat hnawhkhah loh a awm a. Tunhnaiah an chhungte thi aiawhin mi engemaw zat chu sawrkarin a la thei tawk a. Chutih karah heti zat kum khatah an thi anih si chuan indaih tih a awm thei dawn lo tihna a ni.

Heti tak maia police te an thih nasat chhan hi ruihhlo vang niin thenkhat chuan an puh a, hei hi tak tak anih chuan a pawi tak zet zet. Zu leh ruihhlo hluar ta em em mai te hi a pawi tak zet a, chutih kara Mizo ten zu in kan thiam lo lehzel te hi a pawi. Mithiam te chuan tunhnai hian mipa an thi nasa hle tih an sawi a, heng mitthi te hi la naupang tak tak te an ni hlawm a. An thihchhan ah hian zu kaihhnawih a tam hle niin an sawi bawk. Chuvangin kohhran leh khawtlangin tan kan lak thar a ngai hle. Mizoram Police hotu lian te hian an nau te thih chhan hi uluk taka an chhui a, a tihdamna pawh an hriat ngei hi tih makmawh a ni e.