Zo hnahthlakte hi kan vanduai kan ti dawn nge ni tun hnai kum engemaw kalta atang khan harsatna chi hrang hrang kan tawk a. Burma lama zo hnahthlakte chu sipai lamin sawrkarna an pek duh loh avangin tualchhung buaina a chhuak a, silai hial a puah vangin mi thahnem tak himna zawngin Mizoramah an lo lut a. Manipur lamah lah nise Meitei leh zo hnahthlak inkarah buaina a chhuah vangin mi thahnem takin Mizoram an pan bawk a. Chutiang zelin Bangladesh lam lah nise mi thahnem tak himna zawngin Mizoram-ah an lo lut bawk.

Mizoram hi Mizo te ram neih chhun tiin kan sawi thin a, Zofate Jerusalem ti hiala sawi a ni. Hetia kan unau ten harsatna lian tak an tawh takah chuan an tlanchhiatna leh inhumhimna tur chu Mizoram hi a ni. Mizo mipuite pawhin kan theihtawpa duatin kan lo enkawl a, an tan vehbur-te khawnin a theih ang angin kan lo tuamhlawm a ni.

Hetih lai hian tun hnaiah kan unau, harsatna avanga Mizoram rawn bel zingah pawikhawihna thleng a awm ta zauh zauh mai a. Hei hian raltlan kan tih mai enkawl leh an hmu hun chungchangah inhnialna mai bakah thu inchuh lian tak a siam phah a, a pawi tak zet a ni. Zep nak emaw kan unau ram danga awmte hi chu an seilenna hmunin a zir lo nge ni pawikhawih chungchangah hi chuan Mizorama piang leh seiliante ai chuan an hreh lo deuh niin a lang a. Hei mai bakah hrehawm tawrh chungchangah pawh an chhel zawk bawk.

Raltlan zawng zawng hi an sual vek lo a, an zinga misual an inphum thin hian an hming a ti chhe awl hle thung. Kan unau raltlante hi an sual vek lo, mi tha tak tak leh khawtlang pawhin an chhawr tangkai mi engemaw zat an awm. Heng mite hi chu tuman hnawk an ti lo ang, hetih kara mi awmtha duh lo tute emaw vanga harsatna thleng a awm thin hi a pawi a. Hei hian an dinhmun pawh a tih chep phah a ni.

Mizorama zo hnahthlak raltlan chungchangah hian inhnialna lian tak a awm mek a, mi tam takin 'kan unaute an niin harsatna an tawh lai chuan tuamhlawm hi kan bat a ni,' ti an awm a. Thenkhat chuan 'an raltlan chhan ber buaina a reh thaw khat tawh a, harsatna tam tak min thlen vangin an ram lama an haw a hun tawh a ni,' ti pawl an awm bawk. An tan chhan hi a dikna chen a awm ve ve. Engpawh nise Mizo mipuite hian kan theih chin chinah kan unaute tanpui hi kan tih tur a ni a, lehlamah kan unau raltlante pawhin an dinhmun hre chunga awmdan mawi zawk an zir a pawimawh hle.