Mizoram Legislative Assembly Budget Session neih mekah Zirtawpni klta khan eptu MLA pahnih Lalchhuanthanga leh Lalrindika Ralte te private member resolution chu House in lungrual takin a pawm a. Hetianga eptu MLA pahnih resolution ni khata pawm awmchhun a niin hei hian MLA te inlungrualzia a lantir awm e.

Lalrikdika Ralte private resolution 'Kan ram thenawmte atanga sahimna zawnga rawn raltlante hi kan sawrkar hian an awmna tur siamsakin duat takin enkawl se, awmkhawmna tur hmun bik ngaihtuah sak rawh se' tih chu siamtha hretin 'Kan ram thenawmte Myanmar leh Bangladesh atanga an sahimna zawnga kan unau rawn raltlante Mizoram sawrkar leh mipuiin tha taka kan lo dawngsawng hi a lawmawm kan ti a, a tul ang zela lo tuamhlawm chhunzawmin an awmna tur leh an mamawhte ngaihtuah zel ni rawh se' tia lungrual taka pawm a ni.

Mizorama rorelna in sang ber Assembly ah meuh kan unau te thlavang hauhna thu resolution hial pass a ni lehzel phei hi chu a lawmawm leh zual a. Mizo mipuite tanrual zia hi hnamdangte pawhin an hmu zel dawn tihna a ni a, tun anga kan tanrual chhoh zel chuan Mizote hi hnam ropui leh mite entawn a nih chhoh zel a rinawm. Hetih karah hian kan unau raltlante pawhin midangte harsatna siam zawng leh mit tikham lo zawnga an khawsak a pawimawh hle awm e.

Mizote hi sawrkar pathuam Myanmar, Bangladesh leh India ah te kan awm darh a. Chutih rual chuan Mizoram chiah hi Mizo hminga ram awmchhun anih avangin engemaw harsatna thleng lo awm tawh thinah pawh kan tlankhawmna leh kan sahimna hmun, Zofate Jerusalem-a kan ngaih a ni. Tunhnaia Myanmar leh Bangladesh atanga sahimna zawnga lo lut te kan lo dawnsawn danah pawh sawrkar, kohhran leh tlawmngai pawl te an tangrual tak zet tih a lang a, thil lawmawm tak a ni. Chuvangin hetia kan unaute an Jerusalem ngeia an rawn tlankhawm hi a lawmawm a, duat taka kan lo kuangkuah zel hi kan tih tur dik tak a ni.