Kan hriat angin Mizoram chuan foreign ram pahnih Bangladesh leh Myanmar (Burma) te kan ri a. Heng kan ramri pahnih zingah hian Bangladesh nen kan inrina hmun te chu hung a ni a, mipuiin kan thlawp viau niin a lang. Tun hnai deuh khan Union Home Minister Amit Shah chuan Myanmar leh India inrina ramri chu hung a ni dawn tih a puang a. He thil hi duh lo leh duh an inzat nawk niin a lang.

Mizorama tlawmngai pawl hrang hrang intelkhawm chuan ramri hung an duh loh thu leh ramri a chengte Visa tel lova inkalpawhtheihna 'free movement regime' pawh thiah an duh loh thu an sawi a. Political party te pawhin ramri hung hi an do a. CM Lalduhoma ngei pawhin chanchinbumite hmaah sawrkar laipuiin India leh Myanmar ramri hung a tum chu a thulh a rin thu a lo sawi tawh bawk a ni.

Mizote hi hmun hrang hrangah thendarhin kan awm a. Myanmar, Bangladesh, Manipur, Tripura leh Assam state-ah te kan awm a. Mahse kan inpui ber leh kan ta kan tih theih chhun chu Mizoram hi a ni awm e. Tun hnai maia Myanmar, Bangladesh leh Manipur buainaah pawh kan pan khawm ber chu Mizoram a ni. Tun hnaia Bangladesh buainaah hian ramri hung anih avangin zo hnahthlak Mizoram pan tur ten harsatna nasa tak an tawk a, hetih lai hian Myanmar lam erawh chuan harsatna an tawk lem lo thung.

Ramri hung chung-changah hian ngaihdan lian tak pahnih insual mek a awm a, chu chu ramri hung duh leh duh lo an ni. Ramri hung duh leh duh lote hian tan hmun tha tak an nei ve ve a, khawi lam lam pawhin han sawi se a dik ve ve a ni. Ramri hung hi political party leh NGO Coordination Committee chuan nasa takin do mahse chhim lama tlawmngai pawl lian tak Central Young Lai Association erawh chuan an thlawp thung. Mizoram leh Myanmar ram thui tak hi Lai area a awm a ni a, hetia CYLA ten ramri hung an duh thu an sawi hian chhan tha tak a neih ngei a rinawm.

Tun hnaiah Mizoram chhungah ruihhlo a hluar em em a, thi pawh an tam hle. Heng ruihhlo zawng zawng deuh thaw hi khaw chhak lam atanga lo kal a ni a. Chumai bakah ralthuam tawlhruk leh dan lova sumdawnna tam ber pawh hi khaw chhak lam tho a ni. Ramri hung anih avang hian kan intlawhpawh thei tawh dawn lo tihna a ni lo a, tun ang hian a zalen tawh dawn lo tihna mai a ni. Ramri hi hung ni ta se chuan khawchhak lam atanga thil tha lo tak tak lo lut hi kan tirem thei a nih em loh pawhin a ziaawm ngei a rinawm.