India sawrkar chuan thenawm ram Myanmar nen inpawhna tha zawk a awm theih nan ramri atanga km 16 huam chhung chu visa ngai lova inkalpawh theih Free Movement Regime (FMR) atan a siam a. He thil hi Mizote pawhin kan hmang tangkaiin Myanmar ram chhung, Chin state a khawsa mai bakah a chhak lam thlenga zo hnahthlakte an awm avangin km 16 aia thui hi FMR chhuanlam hian kan kal theih phah a ni. Mahse tunhnaiah sawrkar laipui chuan thuthar neiin zalen taka ramri atanga km 16 chhung inkalpawh theihna Free Movement Regime chu tihtawp a tum thu a puang a. Hei mai ni lovin chhuanlam chi hrang hrang siamin Myanmar nena kan inrina lai pawh hung a tum thu a puang a, hei hian Mizo mipuite min barakhaih hle.

Free Movement Regime kan neih avang hian Myanmar lama kan unaute nen pawh inpawhna tha tak kan nei thei a, FMR hi awm ta lo se chuan harsa taka visa nen intlawh kan ngai dawn tihna a ni a. Visa nen chauha kan zin thei anih chuan tun ai hian kan inkalpawh lo sauh dawn tih a chiang reng a, insuihkhawmna atana hmalakna pawh hian nasa takin a tuar ngei ang. Politics kalsual avangin zan khat thil thuah German mipuite chu thenhran an ni a, chutiang bawkin hnam khat Korea ram pawh thenhran an ni. Unau, chhungkua leh thiantha engemaw zat an inthen a, mittui a luang hnem hle anih kha.

Mizo mipuite hian sawrkar laipui hmalakna hi kan duh lo tak zet a, kan thlirna atang chuan duh loh leh a tawp thlenga do hi kan tih tur dik tak a ni. Chutih rual chuan sawrkar laipui thlirna atanga thlir chuan tih awm tak a nihna chen hi a awm tih kan hriatpui a tha awm e. Free Movement Regime hi hmun thenkhatah chuan hmang sualin foreigner lo luhna remchang tak a ni a, misual leh dan lova sumdawng tan hmansual theih tak a ni. Kan hriat angin Myanmar ram chu ruihhlo siamna hmunpui golden triangle bul maia awm a ni a, Myanmar atang hian ruihhlo engemaw zat hi ramri kanin India ramah phurhluh a ni thin a. Heng zawng zawngte hi sawrkar laipui pawh hian a hre vek a, heng sualna hrang hrang tih ziaawmna atan hian ramri hung leh FMR tihtawp hi a damdawi tha tak a ni ve tlat a ni. Chutih mek laiin Manipur buaina kaihhnawihah an state sawrkar chuan chhuanlam chi hrang hrang hmangin ramri hung tur leh FMR titawp tur hian sawrkar laipui an kar ve reng bawk a, hetia hmalak a ni hi kawng lehlama thlir chuan a mak vak lo thei bawk.

Sawrkar laipuiin tuna ruahmanna a kalpui anga ramri hi hung a nih a, zalen taka kan intlawh theihna Free Movement Regime hi tihtawp anih bawk chuan a tuar ber tur chu Zofate hi kan ni. Chuvangin ramri hi hung a nih lohna tur leh Free Movement Regime hi tihtawp a nih lohna turin theihtawpa tangruala kan beih zel hi kan tih tur a ni.