Food, Civil Supplies & Consumer Affairs Minister B.Lalchhanzova chuan July ni 3,2024 khan chanchinbumite hmaah Mizoram sawrkarin ration card var neitute tan buhfai kg khat Rs. 15 a leitir thin chu Rs. 30 ah a tisang dawn tih sawiin, he hmalakna avang hian sawrkar chuan thla tin Rs. 5,25,93,072 a hum thei dawn niin a sawi a. Buhfai Kg khata subsidy Rs. 25 pek thin chu Rs. 10 ah ti hniamin Card var hmangtuten Rs. 15 a an khul thin chu Rs. 30 in an khul tawh dawn tihna a ni a.

He hmalakna avang hian sawrkarin kum khatah Rs. 63,11,16,864/- a hum thei dawn tihna a ni. Minister sawi danin tun dinhmunah Mizoramah ration card nei mek mi 2,88,757 awmin, mihring 11,72,378 a huam a, he tah hian Food Security dawng thei zat chu mi 7,06,296 an ni a.NFSA dawng thei hi thingtlang ah 35% (4,13,017) ni in, Urban ah 25% (2,92,764) an ni.

Ration card var nei ten buhfai man tlawma an lak thin tihtawp anih dawn thu hian sawi zui a hlawh hle mai a, Phuldungsei khuaa chhungkaw 85 te ration card paih (delete) an ni pawhin mipuiah titi a siam tam hle. Phuldungsei a chhungkaw ration card 85 paih anih chungchangah hian a bialtu MLA Robert Romawia Royte chuan Chief Minister hnenah ngenna thlenin Zampui Phuldungsei khua khu geological survey a a lan dan leh Mizo history atanga en pawhin Mizoram chhunga mi a ni a.

MNF sawrkar chuan Village Council te pawh a lo pe tawh a, hun hmasa lama Congress sawrkar lai atang daih tawh pawhin Mizoram voters list leh ration cards ah an awm tawh tih sawiin a rang thei ang bera heng mite hi an ration card pe let leh turin a ngen a ni. Phuldungsei khuaa ration card paih sak te pawhin lungawilohna lantirin Mizoram sawrkar chu a thu­tlukna sut tur leh ration card siamsak leh turin an ngen a ni.

Kan hriat angin inthlang ram kan ni a, Mizoram pawhin kum 5 danah kan ram roreltu tur kan thlang thin a ni. Ministry thar a lo dinin ram kaihhruai duh dan an nei a, tuna rorelna chelh mek pawhin policy leh manifesto hmangin ram kaihhruai an tum a ni. Rorel lai ZPM ministry thla 7 emaw awrh kan hrawn chhung hian Minister B.Lalchhanzova department chanah hian thil thar 'change' a awm tam ber em aw a tih theih a. Land Revenue & Settlement lamah stamp duty chu 1% atangin 3% ah tihsan a ni a.

Hei mai ni lo a department chan dang FCS&CA ah pawh change nasa tak thlengin ration card var nei tana subsidy chu tih hniam a ni. Heng thilte hi a tha nge tha lo tihah inhnialna a chhuak nghal a, engpawhnise a changtu Minister hian hna a thawk ngei tih a ti chiang hle a ni.

Ration card var neite subsidy tihhniam hi thil awm tak, state dang­ah pawh an kalpui niin a lang a. Mahse Mizote erawh hnamdang nen tehkhin theih kan nih lohna a awm a. Mizo chu buh ring hnam kan ni a, zing leh tlai mai bakah chhunah pawh chaw fak thin kan nih avangin buh hi a hek hle. Chumai ni lovin ration card thliar chungchangah hian thil fel lo tam tak a awm niin a lang a, card var nei zingah mi harsa tak tak an awm a, heng chhungkuate hi chuan an tuar na hle dawn tihna a ni.

Phuldungsei khuaa chhungkaw 85 te ration card paih sak pawh hi ngaihtuah that leh a tha khawp mai, Tripura lam chuan an an neih kawp hi pawi ti lovin ration card atang hian an paih duh lo niin an sawi. Mizo hnahthlak, Mizorama awm duh ngawih ngawihte paih luih talh hi sawrkar hian ngaihtuah chiang leh thei se a duhawm hle.