Covid-19 rawn hluar chho mekah tuna a lan danah chuan kan hri leng hi Omicron ni ngei tawhin mi tam tak chuan an ngai tawh a, hri pawh hi a darh chak hle. Nimin zing thleng khan khaw/veng 84 chu Red Zone a puan a ni tawh a, chutihrual chuan veng tam takin Red Zone kan nihna  anga inkhuahkhirhna kan kalpui danah erawh veng tam zawk hi chu kan inthlahdul hle niin a ngaih theih a, hei hian kan hri hi hei ai hian a darh nasa zual ang tih a hlauhawm hle a ni.

    India ram state tam takah hri hi a tlakhniam chhoh viau rualin Mizoramah chuan a vanglai kan hmang chho mek nia ngaih theih a ni a, chuvang chuan hei aia nasa zawk hi kan thleng chho lovang tih a sawi theih loh.

    Mission Vengthlang chuan nimin khan an veng chhung luh tum leh tlan tlang tum te chu an lo ti ding a, veng dang ngenna a avangin an dan hi an tihtawp lailawk a, mahse, hetiang hian hmalak leh an tum. Mission Vengthlang ang hian veng tin hian kan veng theuh ah hetiang hian hma la theuh ila chuan tun ai hian kan hri leng hi a tlak hniam chak ngei a rinawm.

    Tuna a lan danah hian chuan Red Zone puanna veng tam tak hi chu kan inthlahdah viau niin a lang a, veng thenkhat phei chuan hmalak dan tur pawh hriatthiam a har thu an sawi hlawm a. a nihna  takah phei chuan Red zone inkhawm phal loh tih hi kan zawm that ber a nih hmel a, dawr hawn kawngah te, social distancing siam kawngah te hian kan ti tha tawk lo hle. Kan dinhmun thlir hi chuan a tir lama hri kan hlauh anga kan hlauh that leh a, inkhuahkhirhna te tha taka kan zawm leh a hun ta tak zet a ni.

    Red Zone tana sawrkarin inkaihhruaina a siam ang ngei hian kan tih tur kan zawm hi kan tih mai hi a tha a, hei hi hri in min kiansan hma na tur pawh niin a lang. Kan tun dinhmun anga kan inthlahdah a, pawisakna nei miah lova kan pal pawp pawp hi chuan hei aia dinhmun chhe zawk hi kan thlen a hlauhawm tak zet a ni.