DOWNLOAD OUR APP

Read latest news on your phone
app-store
Editorial - Ruihhlo do
Sep 18, 2022

Tunhnai hun engemaw chen atang khan Mizoramah ruihhlo a hluar hle mai a. Kan thalai zingah pawh ti thar an tamin ruihhlo man pawh a tlawm hle a. Heti tak maia ruihhlo a hluar chhan hi kan thenawm Myanmar ah sawrkar mumal a awm loh vang niin a lang a. Ni danga sawrkarin ruihhlo do kawnga hma a lakna thinah hma a lak theih tak loh vang-in ruihhlo hmanga sumdawng thin te an zalen ta niin a hriat a. Ruihhlo man pawh a tlahniam hle a ni.

Ruihhlo a hluar tak em avang hian Central YMA chuan ruihhlo do tur Central Anti Drugs Squad (CADS) a din ta hial a. Hetia kan tlawmngai pawl lian berin hma an la ta hi thil lawmawm tak a ni a, dan leh thupek kengkawhtu Police te leh Excise & Narcotics department te nen tha taka an thawhho chuan rah duhawm tak kan hmuh ngei a rinawm.

Ruihho kan dona kawngah hian fimkhur taka kal a pawimawh hle a. Mi tam tak chuan ruihhlo ti thin leh ngawlvei te hi kan hmachhawn ber nia ngai an awm thin a. Heng ruihhlo ngai te hi mi khaw-ngaihthlak an ni a, damlo chi khat an ni tih hriain ruihhlo in a bawih-na lak atan chhanchhuah hi kan tih tur a ni a. Heng mite hi do lovin an saltanna atanga hruaichhuah hi kan tih tur a ni.

Ruihhlo kan dona kawnga kan hmachhawn tur ber te chu ruihhlo zuar te hi an ni. Heng ruihhlo zuar, an mihringpuite chhiat vekna pawh pawi ti lo te hi an ngeiawm a. Heng mite hi kan do a, dan in an chunga hremna a lek ngei theihnan kan tanrual hi a ngai tak zet a ni. Heng ruihhlo zuarte hi an fingin sum pawh an nei a, chuvangin hmachhawn pawh a hautak hle ang.

Tuna YMA in ruihhlo a do kawngah pawh hian mi tam tak chuan 'YMA tih tur a ni lo' ti zawnga sawi te pawh an awm a. Mahse ruihhlo in kan khawtlang a tihchhiat nasat zia te, kan thalaite a bawih nasat tawhzia te hmuh hi chuan YMA te an penchhuak hi thil lawmawm tak a ni. YMA hian a tih tur dik tak a ti a, an hmalakna hi mipui ten an thlawp tlat a ni tih hre thar zel teh se.

Ruihhlo do hi a hautak a, tan mar reng ngai a ni bawk. Chuvangin YMA pawh hian tha thlah mai lova hma a lak reng a pawi-mawh dawn a. Chutih rual chuan ruihhlo do kawngah hian fimkhur taka hmalak a pawimawh a ni tih an hriat nawn fo a pawimawh. Thahnemngaih vanga lo kal fawr lutuk leh kut thlak mai te pawh thil awm thei a ni. YMA hian theihtawpin ruihhlo hi do zel se, chutih rual chuan engemaw sawi-selna leh kalsual palh theih anih avangin Police leh Excise te nen tangho zel thei se a duhawm hle.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh