Tun hnaiah Mizorama dan leh thupek kengkawhtu hrang hrang Mizoram Police, Excise & Narcotics Department, Assam Rifles mai bakah tlawmngai a duty ten ruihhlo an man tam hle mai a. Hei hian Mizoramah a ruihhlo a hluar hle tih a entir bakah ruihhlo kalvelna kawng a ni tih chiang takin a lantir a ni.

Ruihhlo hi a huarin thalai zingah a ngawlvei an tam hle a, hei mai bakah rawlthar zingah pawh ti thar an tam a. School naupang zingah chuan ganja zu an tamin college kal tir zingah heroin a hluar hle niin an sawi a. Heng zirlaite hian an thiante tih thin chu tih ve chakin an intihhmuh ve zel niin an sawi bawk a, a pawi tak zet a ni.

Ruihhlo hi sawrkar in nasa takin a do a, mahse mi leh sa a ngah tawk loh bakah mamawhtu an awm reng a vang te, a zuartute tan sum hmuhna tha tak a nih bawk a vangin rem lam ai chuan hluar lam a la pan zel tih a lang a. Excise & Narcotics Department chhinchhiah dan chuan kumin chhunga ruihhlo hman sual vanga thi hi mi 61 an tling tawh a, chhinchhiah loha thi eng zat nge awm ang le? Ruihlo do kawngah hian sawrkar hian dan dinglaite en thain siamthat ngai a awm em tihte ngun takin zirchiang se. Ruihhlo do kawngah kan tihdan dik lo a awm em tih ngaihtuah chunga ko thlak ngai a awm leh awm lohte ngun taka zir a tha hle.  

Ruihhlo hian kan thalaite hi a suat nasa tak zet a, kuminah thla 9 emaw chauh hun kan la hmang chungin khiti zat ruihhlo vanga an boral hi a thinrimthlak hle a ni. Kumin chhungin thla 3 emaw vel kan la nei a, tun ang renga kan kal chuan kumin hi ruihhlo vanga kan thih tam ber kum a ni mai ang tih a hlauhawm ta hle. India rama a chhe zawnga record kan neih thin hi tawp lul teh se.

Chuvangin ruihhlo do leh tih rem kawngah tute mah awl thei kan ni lo tih hriat thar a tul a. Ruihho ngeiawmna em em chu natna tha lo tak tak a keng tel leh rukruk mai bakah sualna dang a keng tel hi a ni. Tun dinhmunah chuan dan leh thupek kengkawhtu ten theihtawp an chhuah chungin an thlen chin kan hria a, tlawmngai pawl pawhin engmah hlawh nei lovin an do bawk a, an thlen chin kan hre bawk. Chuvangin tun aia nasa leh zuala kohhran hi a chet a ngai ta ni berin a lang. Heti tak maia ruihhlo in min chim nasat chhan hi uluk taka chhui a, a damna tur damdawi hmuh­chhuah ngei a pawimawh.