EDITORIAL : Ruihhlo laka naupang venhim
![](https://zalen.s3.ap-south-1.amazonaws.com/images/news/1716630371_Editorial.jpg)
Kan hriat theuh angin Mizoram chu India leh Myanmar ramri a awm kan ni a. Kan chhak lawk chu khawvela ruihhlo siamna hmunpui ber 'golden triangle' awmna a ni a, Mizoram hi ruihhlo tawlhna kalkawngah hman a nih avangin nitin deuh thaw man tur hi a awm a. Tualchhung buaina avanga ruihhlo tawlhtu ten Manipur state an paltlang ngam loh hnu phei chuan Mizoram kaltlanga ruihhlo tawlh hi a hluar lehzual niin a lang.
Mizorama dan leh thupek kengkawhtu hrang hrang te pawhin nasa takin ruihhlo a ziaawm theih nan hma an la a. Mizoram Police chuan kumin thla 4 emaw lek kan hman lai hian heroin ringawt pawh kgs 27 chuang an man tawh a. Excise & Narcotics Department chuan kum 2023-2024 chhung khan heroin kgs 94 chuang an man bawk a, Assam Rifles pawhin thahnem tak an man bawk a ni. Hei mai bakah Mizorama tlawmngai pawl lian ber Central YMA hnuaia ruihhlo do tu Central Anti Drugs Squad chuan December ni 12,2023 atanga May ni 19,2024 chhung lek khan heroin hawng 387 chuang an man bawk a ni. Hei hian a entir chu ruihhlo hian min chamchilh thuk hle tihna a ni a, ruihhlo vanga boral kan neih ho pawh hi heroin (No.4) kaihhnawih vanga boral an ni deuh vek a ni.
Mizorama dan leh thupek kengkawhtute mai bakah tlawmngai pawl ten heti zat ruihhlo hi man bawk mahse man loha kaltlang leh Mizoram chhunga tihral hi a let engemaw zata tam a ni ngei dawn a. Ruihhlo hian min chamchilh thuk tawh hle a, kan chhungkua kan him anih pawhin kan tukverh-ah hian a rawn zak zuau zuau tawh tih hi kan pawm a tul. Kan tu leh fa, kum la naupang tak tak te hi ruihhlo lakah an him em tih kan chik fo a pawimawh a, tunhnaiah phei chuan naupang chhumchhiaa kan ngaih middle school zirlai thlengin ngawlvei an awm tawh a ni.
Ruihhlo hian tur chak tak a nei a, a bawiha tan tawh chuan talchhuah leh chu har tak a ni. Hei vang hian Mizoram hi a micheng ngaihtuaha ruihhlo ngai enkawlna 'Home' ngah ber kan ni hial mai thei a, kan home te lah chu a tawt em em reng mai a. Chutih rualin nitin mai hian dah luh tur hi an awm reng bawk a. Chuvangin naupang venhim kawngah nu leh pa, khawtlang leh kohhrante kan tanrual a tul tak zet tawh a ni. Chief Minister kaihhruaina hnuaiah ruihhlo do tur committee sang leh thunei tak kan nei a, hei hian awmze nei taka hma a lak a pawimawh hle. Kawng hrang hrangin supply ti tlem tur te, a la ti ve lote venhim leh ruihhlo a harsatna tawkte enkawl kawngah tanho thiam a pawimawh hle. Ruihhlo hi a ngawlvei tawh chuan sim a har em avangin a la ti ve lote venhim kawngah tun aia tanlak lehzual a pawimawh hle.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024